اسلام آباد(ممتازنیوز)سینیٹ میں پاکستان مسلم لیگ (ن) کے پارلیمانی پارٹی لیڈر اور خارجہ امور کمیٹی کے سربراہ سینیٹر عرفان صدیقی نے کہاکہ آرمی چیف جنرل عاصم منیر کے حضور عرضیاں گذارنے والے عمران خان بہادر بنیں۔ اعصاب جواب دے گئے ہیں تو پورا سچ بھی اگل دیں۔کہہ ڈالیں کہ ہاں پی ٹی آئی کو فوج سے میں نے لڑایا، ہفتہ کوسماجی رابطوں کی سائٹ ایکس پرجاری پیغام میں عرفان صدیقی نے کہاکہ جنرل عاصم منیر کی تقرری روکنے کے لئے پنڈی پر یلغار میں نے کی، کبھی خود کبھی بیگم پر قاتلانہ حملوں کے الزامات میں نے لگائے، 9 مئی کو عاصم منیر کا تختہ الٹنے کے لئے فوج میں بغاوت کی سازش میں نے کی، دو سو سے زیادہ فوجی تنصیبات اور شہدا کی یادگاروں پر حملے میں نے کرائے، فضائیہ کے طیارے میں نے جلائے، ہیلی کاپٹر حادثے کے شہدا کا مضحکہ میں نے اڑایا، سوشل میڈیا سے عاصم منیر اور فوج کو گالیاں میں نے دلوائیں اور دلوا رہا ہوں، بیرون ملک اپنی فوج اور چیف کے خلاف بسوں پر اشتہاری مہم میں نے چلوائی، عاصم منیر کو اس عہد کا یحی خان باور کرانے والی وڈیو میں نے بنوائی، جیل میں بیٹھ کر فوج اور چیف کے خلاف مضمون میں لکھ رہا ہوں۔ الزام دوسروں کے سر تھوپنے کے بجائے مردانگی کا مظاہرہ کریں۔
(ظفر اقبال سے معذرت کے ساتھ)
مان لو تم نے ہی یہ سب کچھ کیا عمران خاں
آدمی کو صاحب کردار ہونا چاہئیے