راولپنڈی(ممتازنیوز)وزیراعلی پنجاب مریم نواز شریف کی ہدایت پر سینیئر وزیر مریم اورنگزیب کا راولپنڈی کے تین ہسپتالوں کا اچانک دورہ،سینیئر وزیر پنجاب مریم اورنگزیب نے ہولی فیملی ہسپتال، بے نظیر بھٹو شہید ہسپتال اور ڈسٹرکٹ ہیڈ کوارٹر (ڈی ایچ کیو) ہسپتال کا دورہ کیا،افسران اور عملے کی دوڑیں لگ گئیں، ہولی فیملی میں توسیعی بلاک کا بھی معائینہ کیا۔
سینئیر وزیر پنجاب مریم اورنگزیب نے کہاکہ وزیر اعلیٰ پنجاب کی ہدایت پر ہولی فیملی ہسپتال کی نو تعمیر شدہ ایمرجنسی رواں ہفتے میں کام شروع کر دے گی،ہولی فیملی ہسپتال میں ایمرجنسی ریکارڈ مدت میں تیار کی گئی جس سے عوام کا ایک دیرینہ مسئلہ حل ہو جائے گا۔
سینیئر وزیر نے ہولی فیملی ہسپتال کی ایمرجنسی کی تیزی سے تیاری پر حکام اور عملے کو شاباش دی۔
سینیئر وزیر نے ہولی فیملی ہسپتال کے نو تعمیر شدہ توسیعی بلاک اور اولڈ بلاک کا دورہ کیا۔
سینیئر وزیر پنجاب نے ہسپتالوں کے مختلف شعبوں کا دورہ کیا، ایمرجنسی، آپریشن تھیٹر اور ہسپتال میں زیر علاج مریضوں کے لیے سہولیات کا معائنہ کیا۔
سینیئر وزیر پنجاب مریم اورنگزیب نے کہاکہ معیار اور رفتار کے علاوہ منصوبے کی تکمیل کے لیے طے کردہ شیڈول پر بھی کوئی سمجھوتہ نہیں ہوگا،
سینیئر وزیر پنجاب نے مریضوں اور ان کے لواحقین سے بھی گفتگو کی، علاج معالجے کے حوالے سے دریافت کیا۔
سینیئر وزیر پنجاب نے ہسپتالوں میں صفائی ستھرائی، طبی آلات، مشینری کی صورتحال اور مریضوں کے لیے دیگر طبی خدمات کا بھی جائزہ لیا۔
سینیئر وزیر پنجاب مریم اورنگزیب نے ڈی ایچ کیو میں زیر علاج میانوالی کی حلیمہ بی بی کی بھی عیادت کی۔چھت سے گر کر شدید زخمی ہو جانے والی حلیمہ بی بی کو وزیر اعلیٰ پنجاب کی ہدایت پر ائیر ایمبولینس کے ذریعے راولپنڈی منتقل کیا گیا تھا،حلیمہ بی بی اور اس کے اہل خانہ نے ائیر ایمبولینس کے ذریعے جان بچانے اور علاج کی سہولیات فراہم کرنے پر وزیر اعلی پنجاب کا شکریہ ادا کیا،عوام کی خدمت ہی وزیر اعلی پنجاب مریم نواز شریف کا مشن ہے
