لاہور:پاکستان ہاکی ٹیم کے تین کھلاڑیوں اور فزیو نے مبینہ طور پر یورپ میں سیاسی پناہ کی درخواست دی ہے جس کے بعد ان پر تاحیات پابندی عائد کر دی گئی ہے۔
تفصیلات کے مطابق پاکستان ہاکی فیڈریشن کے سیکریٹری اولمپئن مجاہد علی نے پریس کانفرنس کرتے ہوئے کہا ہے کہ قومی ہاکی ٹیم کے تین کھلاڑی مرتضیٰ یعقوب، احتشام اسلم اور عبدالرحمان کے بیرون ملک سیاسی پناہ کی درخواست دیے جانے کی اطلاع ہے۔
رانا مجاہد نے بتایا کہ قومی ہاکی ٹیم کے مذکورہ تینوں کھلاڑی اور فزیو ٹیم کے ساتھ پولینڈ گئے تھے لیکن وطن واپس نہیں آئے۔ انہوں نے لیٹر لکھ کر کیمپ میں آنے معذرت کی۔
ان کا کہنا تھا کہ تینوں کھلاڑی بغیر این او سی کے بیرون ملک گئے لہذا تینوں کھلاڑیوں اور فزیو وقاص پر تاحیات پابندی لگا دی گئی ہے۔
سیکرٹری پی ایچ ایف نے کہا کہ ہم ان کھلاڑیوں کے معاملے پر مزید کارروائی کے لیے وزارت داخلہ کو لیٹر لکھیں گے۔ بیرون ملک جانے والے یہ کھلاڑی اذلان شاہ کپ سے پہلے کراچی کے کیمپ کا حصہ تھے۔