اسلام آباد(نیوز ڈیسک)وزیراعظم محمد شہباز شریف نے یومِ سیاہ کشمیر کے موقع پر اپنے پیغام میں جموں و کشمیر پر بھارتی قبضے کے 77 سال مکمل ہونے پر کشمیری عوام کی حقِ خودارادیت کی مسلسل جدوجہد کو خراج تحسین پیش کیا۔ وزیراعظم نے کہا کہ آج کے دن، 27 اکتوبر 1947 کو بھارت نے سری نگر میں اپنی افواج اتاریں اور جموں و کشمیر کے ایک بڑے حصے پر غیر قانونی طور پر قبضہ کیا، جس سے کشمیری عوام کی آزادی کی جائز خواہشات کو دبانے کی کوشش کی گئی۔
وزیراعظم نے اس بات پر زور دیا کہ بھارت، اقوام متحدہ کی سلامتی کونسل کی قراردادوں کے باوجود، کشمیری عوام کو ان کا حق خودارادیت دینے میں ناکام رہا ہے۔ انہوں نے کہا کہ بھارت کے زیر قبضہ جموں و کشمیر (IIOJK) کے عوام نے گزشتہ سات دہائیوں سے زائد عرصے میں بے شمار مصائب برداشت کیے ہیں، تاہم ان کی آزادی کے لیے جدوجہد کا عزم اب بھی اتنا ہی مضبوط ہے جتنا 1947ء میں تھا۔
وزیراعظم شہباز شریف نے بھارت کے 5 اگست 2019 کے غیر آئینی اقدامات پر روشنی ڈالتے ہوئے کہا کہ ان کا مقصد جموں و کشمیر کی متنازعہ حیثیت کو ختم کرنا اور کشمیری عوام کو ان کے مستقبل کا فیصلہ کرنے کے حق سے محروم کرنا ہے۔ انہوں نے اس بات کی بھی نشاندہی کی کہ کشمیری عوام کو اپنے روزمرہ کے معمولات اور معاش پر سخت پابندیوں کا سامنا ہے، جبکہ ہزاروں کشمیری سیاسی قید میں ہیں۔ انہوں نے بھارتی قابض افواج کے انسداد دہشت گردی کے نام پر ڈھائے جانے والے مظالم کی مذمت کرتے ہوئے کہا کہ یہ جابرانہ ہتھکنڈے کشمیری عوام کی آزادی کی خواہش کو ماند نہیں کر سکتے۔
وزیراعظم نے یاد دلایا کہ انہوں نے حالیہ اقوام متحدہ جنرل اسمبلی کے اجلاس میں بھی جموں و کشمیر کے تنازعے کے پرامن حل کی اہمیت پر زور دیا تھا۔ انہوں نے کہا کہ جنوبی ایشیا میں امن و استحکام اسی صورت میں ممکن ہے جب اقوام متحدہ کی سلامتی کونسل کی قراردادوں کے تحت جموں و کشمیر کے مسئلے کا منصفانہ حل نکالا جائے۔
شہباز شریف نے بھارت کو خبردار کیا کہ وہ کشمیری عوام کی حقیقی امنگوں کو اپنے جابرانہ اقدامات سے دبا نہیں سکتا اور کہا کہ پاکستان ہمیشہ اپنے کشمیری بھائیوں اور بہنوں کے ساتھ کھڑا رہے گا۔ وزیراعظم نے اس عزم کا اعادہ کیا کہ پاکستان کشمیری عوام کی مکمل اخلاقی، سفارتی اور سیاسی حمایت جاری رکھے گا اور اقوام متحدہ کی قراردادوں کے مطابق جموں و کشمیر کے تنازعے کے حتمی حل تک کشمیری عوام کے حق خودارادیت کی وکالت کرتا رہے گا۔
