ماسکو(مانیٹرنگ ڈیسک)وزیراعظم عمران خان نے روس کے صدر ولادی میرپیوٹن سے کریملن میں سربراہ ملاقات کی جس میں دونوں رہنماوں دوطرفہ تعلقات اور باہمی دلچسپی کے علاقائی و عالمی امور پر تفصیلی مشاورت کی۔ملاقات کے حوالے سے اعلامیہ جاری کردیاگیا ہے۔اعلامیے کے مطابق دونوں رہنماوں نے دو طرفہ تعلقات کو مذید مستحکم کرنے پر اتفاق کیا۔اس موقع پر وزیراعظم نے کہاکہ اعتماد اور ہم آہنگی سے مختلف شعبوں میں باہمی تعاون کو وسعت ملے گی۔ انہوں نے پاکستان اور روس کے درمیان فلیگ شپ اقتصادی منصوبے کے طور پر پاکستان سٹریم گیس پائپ لائن کی اہمیت کا اعادہ کیا۔ وزیراعظم نے توانائی سے متعلق ممکنہ منصوبوں پر تعاون پر بھی بات کی۔ انہوں نے روس کے ساتھ طویل المدتی، کثیر جہتی تعلقات استوار کرنے کے لیے پاکستان کے عزم پر زور دیا۔ وزیراعظم نے انسانی بحران سے نمٹنے اور افغانستان میں ممکنہ اقتصادی بحران کو روکنے کی فوری ضرورت پر زور دیا۔ پاکستان مستحکم، پرامن اور منسلک افغانستان کے لیے عالمی برادری کے ساتھ مل کر کام کرتا رہے گا۔وزیراعظم نے مقبوضہ کشمیر میں انسانی حقوق کی سنگین صورتحال پر روشنی ڈالی ۔وزیراعظم نے جموں و کشمیر کے تنازعہ کے پرامن حل کی ضرورت پر زور دیا۔