اسلام آباد(ما نیٹرنگ ڈیسک)پاکستان مسلم لیگ (ن) کی ترجمان مریم اورنگزیب نے اپنے بیان میں کہا ہے کہ پیکا سمیت تمام کالے قوانین کے خلاف ہر فورم پر جنگ جاری رکھیں گے ۔

ان کا کہنا تھا کہ سیاہ حکومت سیاہ قوانین سے عدم اعتماد سے بچ نہیں سکتی ، کالے قوانین بھی کالی حکومت کے ساتھ رخصت کریں گے۔ عمران صاحب کے جانے سے ہی پارلیمنٹ کے دروازے پر لگا تالا کھلے گا۔عمران صاحب کو خوف ہے کہ پارلیمنٹ کی کرسیاں الٹا دیں، قالین اکھاڑ دئیے ۔ان شاءاللہ ، تمام کالے قوانین کو بھی اسی طرح اکھاڑ کر پھینکیں گے ۔

عمران صاحب جتنی مرضی کرسیاں الٹائیں، قالین اکھاڑیں، کالے قانون جاری کریں، آپ کی کرسی الٹنے سے نہیں بچ سکتی۔ مریم اورنگزیب کا مزید کہنا ہے کہ معزز عدالت نے ہمارے وکیل منصور صاحب کو عدالتی معاون مقرر کیا ہے ۔مقدمے کی سماعت کے دوران وہ ہمارے موقف کو بیان کردیں گے ۔حکومت اتنی خوفزدہ ہے کہ پارلیمنٹ کو مفلوج بناکررکھ دیا ہے۔