اسلام آباد(مانیٹرنگ ڈیسک) خاتون اول کی قریبی دوست فرح خان کے شوہر احسن جمیل گجر نے کہا ہے کہ میری بیگم اور خاتون اول کا آپس میں بہنوں جیسا تعلق ہے، مجھے نہیں پتا فرح جس جہاز میں بیٹھی وہ کس کا جیٹ طیارہ تھا، فرح کے پاس کوئی ایسی چیز نہیں جو دنیا سے الگ ہو۔ نجی ٹی وی سے گفتگو کرتے ہوئے احسن جمیل گجر نے کہا کہ فرح 2005 سے پورشے گاڑی چلا رہی ہے، چوبر جی جہاز میں بھی کئی لوگوں نے تصویریں بنوائی ہوئی ہیں، مجھے نہیں پتا فرح جس جہازمیں بیٹھی کس کا جیٹ طیارہ تھا، تصویروں سے اندازے لگائے جارہے ہیں، فرح کے پاس کوئی ایسی چیز نہیں جو دنیا سے الگ ہو، جس گاؤں کا ذکر ہورہا ہے وہاں آبائی گھر، اس گھر کو ویلفیئر کاموں کے لیے استعمال کیا جاتا ہے، ایم این ایز، ایم پی ایز ہزاروں سڑکیں بناتے ہیں۔انہوں نے کہاکہ انیس گاڑیاں ہمارے نام پرہیں ہم قبول کرتے ہیں ،کچھ گاڑیاں ہم نے 2015میں خریدی تھیں،جس وقت گاڑیاں خریدی پی ٹی آئی کی حکومت نہیں تھی، 2013کی گاڑی ہم نے فروخت کرے 2015میں خریدی، کچھ گاڑیاں ہم بیچ چکے ہیں لیکن لوگوں نے ٹرانسفر نہیں کرائیں ۔فرح خان کے شوہر کا مزید کہنا تھا کہ میرا سیاست سے کوئی تعلق نہیں،گوجرانوالہ میں ڈپٹی کمشنر یا پولیس کے کسی کام میں مداخلت نہیں کی، ڈپٹی کمشنر، پولیس حکام سے پوچھا جاسکتا ہے، گوجرانوالہ میں ہماری زمینیں، ہاؤسنگ سوسائٹی ہے، ہم نے کبھی گوجرانوالہ میں کسی سرکاری کام میں مداخلت نہیں کی،ہم نے اثاثے ایف بی آر میں ڈکلیئر کئے ہوئے ہیں، ہماراکاروبار پوشیدہ نہیں ہے ۔انہوں نے کہاکہ پاکستان کے کسی پولیس اسٹیشن میں ہمارے خلاف کوئی مقدمہ نہیں جو بھاگتے، بیرون ملک آنا جانا روٹین کا معاملہ ہے، بیرون ملک ہمارا کوئی کاروبارنہیں، بتایا جائے کس ادارے میں ہمارے خلاف کوئی شکایت ہے؟ فرح اور میں ملک واپس آئیں گے۔انہوں نے کہا کہ ہم بھاگنے والے نہیں اگر کوئی عدالت بلائے گی تو تمام الزامات کا سامنا کریں گے، پاکستان کی عدالتیں آزاد ہیں، نیب، ایف آئی اے سمیت کوئی بھی ادارہ بلائے گا تو پیش ہوں گے، عثمان بزدار کے کسی پرنسپل سیکرٹری سے میرا کوئی ذاتی تعلق نہیں، ساری باتیں مفروضوں پر ہو رہی ہیں،نہ ہمارے کہنے پر کسی کو وزیراعلیٰ بنایا جاتا ہے نہ ہٹایا جاتا ہے، بزدارکو وزیراعلیٰ بننے سے پہلے کا جانتاہوں ،بزدارکو وزیراعلیٰ بناناہوتا تومیں خود بنتایا اپنے خاندان میں سے کسی کو بناتا۔احسن جمیل گجر نے کہا کہ عمران خان کی ذات کو نشانہ بنانے کی کوشش کی جا رہی ہے، چیف سیکرٹری سے پوچھا جائے کیا ہم نے کسی تبادلے کے لیے کہا؟۔انہوں نے کہاکہ فرح کو سافٹ ٹارگٹ سمجھتے ہوئے الزامات کا نشانہ بنایاگیا،سب پروپیگنڈا ہے باتوں میں کوئی حقیقت نہیں،فرح بےچاری کا توکوئی بینک اکاؤنٹ بھی نہیں ،خاتون اول کے ساتھ ہماری نیازمندی ہے کافی پرانا تعلق ہے۔انہوں نے کہاکہ فرح کوکسی نے گھڑی بیچنے کے لئے نہیں دی۔