اسلام آباد(نیوزڈیسک)پی ٹی آئی بلے کے نشان کیلئے اہل ہے کہ نہیں؟ الیکشن کمیشن تحریک انصاف کے انٹرا پارٹی الیکشن کیس کا فیصلہ آج سنائے گا۔
تفصیلات کے مطابق الیکشن کمیشن پی ٹی آئی کے عام انتخابات 2024 کے لئے انتخابی نشان سے متعلق محفوظ فیصلہ آج دن 12 بجے فیصلہ سنائے گا۔ اس حوالے سے چیئرمین پی ٹی آئی کو نوٹس بھی جاری کردیا گیا ہے۔
الیکشن کمیشن نے انٹرا پارٹی انتخابات سے متعلق پی ٹی آئی کو 2 اگست کو نوٹس جاری کیا تھا کہ انٹرا پارٹی الیکشن نہ کرانے پر پی ٹی آئی کو بلے کے نشان کے لئے نااہل کیوں نہ کیا جائے۔
دوسری جانب گزشتہ روز نجی ٹی وی سے گفتگو میں رہنما پی ٹی آئی بیرسٹر علی ظفر کا کہنا تھا کہ انٹراپارٹی الیکشن ہوئے، الیکشن کمیشن میں ریکارڈ جمع کرایا گیا جس پر الیکشن کمیشن نے پارٹی کے حق میں فیصلہ سنایا مگر تحریری فیصلہ روک لیا۔
ان کا کہنا تھا کہ ہمیں خدشہ ہے کہ تحریری فیصلہ تبدیل نہ ہوجائے، البتہ ااگر الیکشن کمیشن نے کہا تو دوبارہ انٹرا پارٹی انتخابات کرا دیں گے۔ بیرسٹر علی ظفر کا کہنا تھا کہ ہمارے پاس فیصلے کو عدالتوں میں چیلنج کرنے کا بھی حق ہے۔