بھارت کے شہر حیدرآباد میں ایک حیران کن ویڈیو وائرل ہورہی ہے جس میں آن لائن ڈیلیوری کرنے والا شخص گھوڑے میں بیٹھ کر گھر گھر کھانا پہنچا رہا ہے، نوجوان کا کہنا ہے کہ پیٹرول کی شدید قلت کے باعث وہ ایسا کرنے پر مجبور ہیں۔
بھارتی ویب سائٹ ٹائمز آف انڈیا کی رپورٹ کے مطابق یہ غیر معمولی واقعہ ایک ایسے وقت میں پیش آیا جب حیدرآباد کے مختلف علاقوں میں پٹرول پمپس پر لمبی لائنیں لگی ہوئی تھیں، شہر میں ٹرک ڈرائیوروں کے احتجاج کی وجہ سے ایندھن کی قلت پیدا ہونے کا خدشہ ہے۔
اسی خدشے کے باعث ڈرائیور ایندھن خرید رہے ہیں جبکہ بڑے احتجاج کے باعث شہر بھر میں ٹریفک جام رہا اور پیٹرول پمپز پر گاڑیوں کی قطاریں لگ گئیں۔
اسی دوران سوشل میڈیا پر وائرل ہونے والی اس ویڈیو میں دیکھا جاسکتا ہے کہ سید فاروق نامی نوجوان گھوڑے پر سوار ہے اور فوڈ ڈیلیور کرنے کے لیے اپنے راستے پر رواں دواں ہے۔
نوجوان کا کہنا ہے کہ وہ تین گھنٹے تک پیٹرول پمپ پر انتظار کرتے رہے لیکن انہیں پیٹرول نہیں ملا، انہیں کھانا ڈیلیور کرنا تھا اس لیے وہ گھوڑے پر سوار ہوکر فوڈ ڈیلیوری کرنے پر مجبور ہیں۔
#Hyderabadi Bolde Kuch bhi Kardete 😅
Due To Closure of #PetrolPumps in Hyderabad, A Zomato Delivery boy came out to deliver food on horse at #Chanchalgudaa near to imperial hotel.#Hyderabad #ZomatoMan #DeliversOnHorse#TruckDriversProtest pic.twitter.com/UUABgUPYc1— Arbaaz The Great (@ArbaazTheGreat1) January 2, 2024
ٹائمز آف انڈیا سے بات کرتے ہوئے نوجوان نے بتایا کہ وہ کسی پبلسٹی سٹنٹ کے لیے ایسا نہیں کررہے بلکہ وہ مجبوری کی خاطر ایسا کررہے ہیں۔
سید فاروق نے کہا کہ ’میں نے 8 ماہ قبل اپنی شادی کے لیے قرض لیا تھا، جسے ہر ماہ ادا کرنا ہے، نوکری کرنا اور وقت پر کھانا پہنچانا میرے لیے بہت اہم ہے، مجھے اپنے قرضوں کی ادائیگی کے لیے رقم کی ضرورت ہے، اس کے علاوہ 80 سالہ والد اور بوڑھی ماں کی دیکھ بھال بھی میرے کندھوں پر ہے۔‘
رپورٹ کے مطابق یہ گھوڑا فاروق نے کچھ وقت کے لیے اپنے دوست سے لیا تھا، وہ گھڑسواری کے ہنر سے بھی واقف ہیں جبکہ وہ ایک دن میں کھانے کے 25 پارسل ڈیلیور کرتے ہیں۔
