کراچی (شوبز ڈیسک)پاکستان شوبز انڈسٹری کی معروف ماڈل اور اداکارہ سنیتا مارشل اور طوبیٰ انوار نے حالیہ انٹرویو میں ’جوائنٹ فیملی سسٹم‘ کی حمایت کا اظہار کیا ہے۔ دونوں اداکارائیں نجی ٹی وی چینل کے ایک پروگرام میں اپنے آنے والے ڈرامہ سیریل ’بے بی باجی 2‘ کی تشہیر کے لیے شریک ہوئیں۔

‘بے بی باجی’ کے پہلے سیزن کی کہانی ایک خاتون کے گرد گھومتی ہے جو اپنے خاندان کو یکجا رکھنے کی خواہاں ہیں، اور اسی پس منظر میں سنیتا مارشل اور طوبیٰ انوار نے بھی مشترکہ خاندانی نظام کی خوبیوں پر بات کی۔

سنیتا مارشل نے اپنی زندگی کے تجربات شیئر کرتے ہوئے کہا کہ وہ جوائنٹ فیملی سسٹم میں رہتی ہیں اور انہیں اس کا بہت فائدہ ہوتا ہے۔ انہوں نے کہا کہ جوائنٹ فیملی میں رہنے کی وجہ سے انہیں گھریلو ذمہ داریوں کی فکر نہیں کرنی پڑتی، اور ان کی ساس گھر کے کئی امور سنبھالتی ہیں، جس کی وجہ سے وہ اپنے کام پر مکمل توجہ دے پاتی ہیں۔

طوبیٰ انوار نے بھی مشترکہ خاندانی نظام کی حمایت کرتے ہوئے کہا کہ اس نظام سے بچوں کی تربیت پر مثبت اثرات پڑتے ہیں۔ انہوں نے مزید کہا کہ اگر سسرال اچھا ہو تو گھر کے بڑے افراد بچوں کی تربیت میں اہم کردار ادا کرتے ہیں، جبکہ علیحدہ رہنے والے خاندانوں میں یہ ذمہ داری پورے طور پر نبھانا مشکل ہو سکتا ہے۔

دونوں اداکاراؤں کا ماننا ہے کہ جوائنٹ فیملی سسٹم ایک مضبوط اور معاون خاندانی ڈھانچہ فراہم کرتا ہے، جو روزمرہ زندگی کے مختلف پہلوؤں میں مددگار ثابت ہوتا ہے۔