بھارتی  حکمران جماعت بھارتیہ جنتا پارٹی(بی جے پی) کے لیڈر تحسین شاہد کے بیٹے نے پاکستانی لڑکی سے شادی کرلی۔
بھارتی سیاستدان کے بیٹے کی پاکستانی لڑکی کیساتھ آن لائن نکاح کی تقریب منعقد ہوئی،بھارتی نوجوان محمد عباس حیدر اور پاکستانی لڑکی اندلیپ زہرا کی شادی پہلے سے طے تھی لیکن دونوں ممالک کے درمیان کشیدگی کے باعث لڑکی کو ویزا نہ مل سکا جس کے باعث دونوں نے آن لائن شادی کرلی۔
دلہن کی والدہ شدید بیماری کے باعث آئی سی یو میں تھیں اور سفری پابندیوں کے باعث مسئلہ پہلے ہی درپیش تھا، جس کے بعد دلہے کے اہلخانہ نے شادی کی تقریب آن لائن منعقد کرنے کا فیصلہ کیا۔
گزشتہ شب دلہے کے اہل خانہ مقامی طور پر جمع ہوئے جب کہ دلہن کا خاندان لاہور سے آن لائن شادی کی تقریب میں شامل ہوا۔
محمد عباس حیدر نے  امید ظاہر کی کہ ان کی اہلیہ کو بغیر کسی پریشانی کے جلد ہی بھارتی ویزا مل جائے گا، دونوں کی آن لائن شادی اس وقت سوشل میڈیا پر زیر بحث ہے۔