سربیئن ٹینس لیجنڈ نوواک جوکووچ، جو کہ ریکارڈ 24 گرینڈ سلیم سنگلز ٹائٹلز اپنے نام کر چکے ہیں، نے ایک بار پھر گرینڈ سلیم ایونٹس کی انعامی رقم میں اضافے پر زور دیا ہے۔

جوکووچ کا کہنا ہے کہ اگرچہ بظاہر کھلاڑیوں کے لیے صورتحال بہتر نظر آتی ہے، لیکن حقیقت میں اب بھی بہتری کی گنجائش موجود ہے۔ ان کے مطابق:

“یہ اچھی بات ہے کہ گرینڈ سلیمز انتظامیہ کھلاڑیوں کے لیے انعامی رقم بہتر بنانے پر تیار ہے، لیکن مجھے لگتا ہے کہ اس میں مزید اضافہ ہونا چاہیے۔”

یاد رہے کہ رواں سال انعامی رقم کا معاملہ ایک متنازعہ موضوع بنا رہا۔ دنیا کے سرفہرست 20 مرد اور خواتین کھلاڑیوں نے ایک مشترکہ خط میں گرینڈ سلیم ایونٹس کی انتظامیہ سے زیادہ آمدنی دینے کا مطالبہ کیا تھا۔

واضح رہے کہ ٹینس کے سب سے بڑے ایونٹس یعنی چار گرینڈ سلیمز — آسٹریلین اوپن، فرنچ اوپن، ومبلڈن اور یو ایس اوپن — ہر سال لاکھوں شائقین کی توجہ کا مرکز بنتے ہیں اور ان کی آمدنی اربوں ڈالرز تک پہنچتی ہے۔

ماہرین کا کہنا ہے کہ ان ایونٹس کی بھاری آمدنی کے مقابلے میں کھلاڑیوں کو ملنے والی انعامی رقم اب بھی ناکافی ہے، خاص طور پر ان کھلاڑیوں کے لیے جو رینکنگ میں نیچے ہیں۔