یوکرین کے صدر ولادیمیر زیلنسکی نے روسی حملوں پر شدید ردعمل ظاہر کرتے ہوئے کہا ہے کہ روس سفارت کاری کے بجائے طاقت اور تباہی کا راستہ اپنا رہا ہے۔
اپنے تازہ بیان میں صدر زیلنسکی نے بتایا کہ گزشتہ رات دارالحکومت کیف پر روس کے بیلسٹک میزائل حملے میں کم از کم 8 افراد جاں بحق ہو گئے۔ انہوں نے اس حملے کو ایک اور ثبوت قرار دیا کہ “روس کو حقیقی سفارتی عمل سے کوئی دلچسپی نہیں، وہ مذاکرات کی میز کے بجائے میزائلوں کا سہارا لیتا ہے۔”
یوکرینی صدر نے عالمی برادری سے مطالبہ کیا کہ روس کے خلاف مزید سخت پابندیاں عائد کی جائیں، کیونکہ “وہ جنگ کے خاتمے کے بجائے مسلسل قتل و غارت اور تباہی کی راہ پر گامزن ہے۔”
دوسری جانب، یوکرین کی ڈرون فورسز کے کمانڈر نے دعویٰ کیا ہے کہ انہوں نے گزشتہ رات روس کے اندر دو آئل ریفائنریوں کو کامیابی سے نشانہ بنایا ہے، جسے جنگی حکمت عملی کا حصہ قرار دیا جا رہا ہے۔
روس اور یوکرین کے درمیان جاری کشیدگی میں شدت آتی جا رہی ہے، جبکہ دونوں جانب سے حملے اور جوابی کارروائیاں سفارتی راستے کی بندش کا عندیہ دے رہی ہیں۔