تل ابیب(نیوز ڈیسک) اسرائیل کے سیکڑوں ریزرو فوجیوں نے غزہ شہر پر قبضے کی کارروائی کو غیر قانونی قرار دیتے ہوئے ڈیوٹی پر جانے سے انکار کر دیا۔

اسرائیلی میڈیا کے مطابق تل ابیب میں پریس کانفرنس کے دوران فوجیوں نے کہا کہ ہم نیتن یاہو کی جنگ کو غیر قانونی سمجھتے ہیں اور اس میں شامل نہیں ہوں گے۔ فوجیوں نے دعویٰ کیا کہ ہماری تعداد 365 سے زائد ہے اور یہ مسلسل بڑھ رہی ہے۔

انہوں نے مؤقف اختیار کیا کہ غزہ پر قبضہ نہ صرف یرغمالیوں بلکہ فوجیوں اور عام شہریوں کی زندگیوں کو بھی خطرے میں ڈال دے گا، جبکہ موجودہ حکومت اپنی سیاسی بقا کے لیے اس جنگ کو طول دے رہی ہے۔

ریزرو فوجیوں کا کہنا تھا کہ ڈیوٹی سے انکار ہمارا محب وطن فریضہ ہے اور ہم اپنے رہنماؤں سے جواب طلب کرتے ہیں۔

خیال رہے کہ اسرائیلی فوج نے غزہ پر قبضے کے لیے 10 ہزار ریزرو فوجیوں کو طلب کر رکھا ہے۔