اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ انتہا پسندی اور دہشت گردی کے خلاف جنگ میں سکیورٹی فورسز کی غیر متزلزل حمایت جاری رکھی جائے گی۔
بلاول بھٹو نے بنوں میں ایف سی ہیڈکوارٹرز پر حملے اور لکی مروت میں پولیس اہلکاروں پر فائرنگ کی سخت مذمت کی۔ انہوں نے کہا کہ دہشتگردوں کے حملے کو ناکام بنانے پر ایف سی اہلکاروں کے حوصلے اور عزم کو خراجِ تحسین پیش کرتا ہوں۔
پی پی پی چیئرمین نے دہشتگردوں کے ساتھ فائرنگ کے تبادلے میں شہید ہونے والے ایف سی اہلکاروں اور لکی مروت میں شہید ہونے والے پولیس اہلکاروں کو خراجِ عقیدت پیش کیا۔ اس موقع پر انہوں نے شہدا کے خاندانوں سے دلی تعزیت اور یکجہتی کا اظہار کیا اور زخمی اہلکاروں و شہریوں کی جلد صحتیابی کے لیے دعا بھی کی۔
انہوں نے کہا کہ پاکستان پیپلز پارٹی ہمیشہ کی طرح انتہا پسندی اور دہشتگردی کے خلاف جنگ میں سکیورٹی اداروں کے ساتھ کھڑی ہے۔
بلاول بھٹو نے کوئٹہ میں بلوچستان نیشنل پارٹی (مینگل) کی ریلی پر ہونے والے دھماکے کی بھی مذمت کی۔ ان کا کہنا تھا کہ اس افسوسناک واقعے میں قیمتی جانوں کا ضیاع ہوا، متاثرہ خاندانوں اور بی این پی (ایم) کی قیادت سے تعزیت کرتا ہوں۔
انہوں نے اس اعتماد کا اظہار کیا کہ اس گھناؤنے جرم میں ملوث عناصر جلد قانون کے شکنجے میں ہوں گے۔ ساتھ ہی انہوں نے حکومت بلوچستان سے مطالبہ کیا کہ واقعے میں زخمی ہونے والے شہریوں کے علاج معالجے کو ہر صورت یقینی بنایا جائے۔
