آسٹریلیا نے بوئنگ کے اشتراک سے تیار کردہ جدید فوجی ڈرونMQ-28A گھو سٹ بیٹ کی کامیاب پرواز کے ذریعے اپنی دفاعی خودانحصاری کی جانب اہم پیش رفت کی ہے۔ بغیر پائلٹ کے یہ طیارے، جنہیں’’روبوٹ ونگ مین‘‘ کہا جا رہا ہے، مقامی سطح پر گزشتہ نصف صدی میں ڈیزائن اور تیار کیے جانے والے پہلے فوجی ہوائی جہاز ہیں۔
650 ملین ڈالر کی سرمایہ کاری سے تیار کردہ یہ ڈرون دور دراز علاقوں میں پائلٹس کی مدد کے بغیر مشن انجام دینے کی صلاحیت رکھتے ہیں۔ تجرباتی پرواز جنوبی آسٹریلیا کے وومیرا ٹیسٹ رینج میں ہوئی، جو خفیہ ہتھیاروں کی آزمائش کا تاریخی مقام ہے۔
دفاعی صنعت کے وزیر پیٹ کونروئے کے مطابق، دنیا دوسری جنگ عظیم کے بعد سب سے بڑی روایتی ہتھیاروں کی دوڑ کا سامنا کر رہی ہے، اور چین سمیت دیگر ممالک بھی بغیر پائلٹ ڈرونز پر تیزی سے کام کر رہے ہیں۔خلاصہ یہ کہ آسٹریلیا نے جدید ڈرون ٹیکنالوجی میں قدم رکھتے ہوئے “گھوسٹ بیٹ” ڈرون متعارف کرایا ہے، جو ملکی دفاعی صنعت کو مضبوط بنانے اور خطے میں بدلتے سکیورٹی حالات سے نمٹنے کی تیاری کا حصہ ہے۔