وزیراعظم شہباز شریف نے ایوان صدر میں صدر مملکت آصف علی زرداری سے اہم ملاقات کی، جس میں ملک کی موجودہ سیاسی و سیکیورٹی صورتحال سمیت قومی اہمیت کے امور پر تفصیلی بات چیت ہوئی۔ ترجمان ایوان صدر کے مطابق اس ملاقات میں نائب وزیراعظم اسحاق ڈار، وفاقی وزیر احسن اقبال، رانا ثناء اللہ، رانا تنویر حسین اور محسن نقوی بھی شریک تھے۔
ملاقات کے دوران وزیراعظم نے صدر زرداری کو اپنے حالیہ دورۂ مصر اور ملائیشیا سے متعلق بریفنگ دی، جبکہ غزہ میں جاری انسانی بحران اور امن کوششوں سے متعلق عالمی رہنماؤں سے ہونے والی ملاقاتوں پر بھی آگاہ کیا۔ اس موقع پر دونوں رہنماؤں نے خطے اور دنیا میں ہونے والی ان پیش رفتوں کا بھی جائزہ لیا جو پاکستان کے اسٹریٹیجک اور معاشی مفادات پر اثرانداز ہو سکتی ہیں۔
ایوان صدر کے ترجمان کے مطابق، وزیراعظم اور صدر مملکت کے درمیان ایک ون آن ون ملاقات بھی ہوئی، جس میں حکومت کی مجموعی پالیسیوں، قومی ترجیحات اور اہم فیصلوں کی سمت پر مشاورت کی گئی۔ دونوں رہنماؤں نے اتفاق کیا کہ قومی اہمیت کے معاملات پر سیاسی مشاورت کو جاری رکھا جائے گا تاکہ قومی استحکام اور ترقی کی راہ ہموار کی جا سکے۔
دوسری جانب، صدر مملکت کی چیف آف آرمی اسٹاف جنرل سید عاصم منیر سے بھی الگ ملاقات ہوئی، جس میں داخلی اور خارجی سیکیورٹی امور پر تبادلہ خیال کیا گیا۔