پنجاب کی وزیر اطلاعات عظمٰی بخاری نے چیئرمین تحریک انصاف پر کڑی تنقید کرتے ہوئے کہا ہے کہ جیل کی تنہائی نے عمران خان کو ذہنی طور پر مفلوج کر دیا ہے۔
اپنے بیان میں انہوں نے کہا کہ عمران خان ماضی میں جن مذہبی جماعتوں کو دہشت گرد اور شدت پسند قرار دیتے تھے، آج انہی کے لیے اپنی جماعت کو سڑکوں پر لانے کی کال دے رہے ہیں۔ اُن کے مطابق خان صاحب یوٹرن لینے میں ماہر ہیں اور موقف تبدیل کرتے ہوئے انہیں شرم بھی محسوس نہیں ہوتی۔
عظمٰی بخاری نے سوال اٹھایا کہ جب قوم آپ کی فائنل کال کو مسترد کر چکی ہے تو اب کس منہ سے نئی کال دی جا رہی ہے؟ کیا تحریک انصاف اور مذکورہ مذہبی جماعت کا ایجنڈا انتشار پھیلانا ہے؟
انہوں نے خیبر پختونخوا میں بڑھتی ہوئی بدامنی پر بھی تشویش کا اظہار کیا اور کہا کہ جہاں پی ٹی آئی کی حکومت ہے، وہاں دہشتگردی، کرپشن اور بدانتظامی عروج پر ہے۔ اُن کا کہنا تھا کہ یہ جماعت مسائل حل کرنے کے بجائے صرف انتشار پھیلانے کی سیاست کر رہی ہے۔