تنظیمات اہل سنت نے آج کے دن پہیہ جام، شٹر ڈاؤن ہڑتال یا کسی قسم کے احتجاجی مظاہروں کی کال کو سختی سے مسترد کر دیا ہے۔
ترجمان محمد اکرم رضوی نے واضح کیا کہ آج کوئی ہڑتال نہیں ہو گی، بلکہ جمعہ کے خطبات میں سانحہ مریدکے کی شدید مذمت کے لیے قرارداد پاس کی جائے گی۔ انہوں نے کہا کہ ہم پرامن لوگ ہیں اور قانون ہاتھ میں نہیں لیں گے۔ ہماری درخواست ہے کہ حکومت معاملات کو پرامن طریقے سے حل کرے کیونکہ مذاکرات ہی مسائل کا بہترین حل ہیں۔
انہوں نے مزید بتایا کہ حکومت سے بات چیت کے بعد صوبے بھر میں سیل کی گئی مساجد کو دوبارہ کھول دیا گیا ہے، جہاں نماز پنجگانہ اور نماز جمعہ کی ادائیگی کی اجازت دی گئی ہے۔
اسی طرح، ناموس رسالت محاذ نے بھی کسی قسم کے احتجاج یا ہڑتال کی کال کی تردید کی ہے۔ محاذ کے رہنما مولانا محمد علی نقشبندی نے کہا کہ اگرچہ سانحہ مریدکے کے باعث تین روزہ سوگ کا اعلان کیا گیا تھا، لیکن شٹر ڈاؤن یا پہیہ جام کی کوئی کال نہیں دی گئی۔