وفاقی وزیر داخلہ محسن نقوی نے کہا ہے کہ پیپلز پارٹی وفاقی حکومت کی ایک اہم اتحادی جماعت ہے اور موجودہ نظام میں اس کا کردار نظر انداز نہیں کیا جا سکتا۔ انہوں نے ان خیالات کا اظہار چیئرمین پیپلز پارٹی بلاول بھٹو زرداری سے ملاقات کے دوران کیا۔
ذرائع کے مطابق بلاول ہاؤس میں ہونے والی ملاقات میں سیاسی صورتحال، امن و امان اور مسلم لیگ ن اور پیپلز پارٹی کے درمیان اختلافات پر تفصیلی گفتگو ہوئی۔ محسن نقوی کا کہنا تھا کہ مشترکہ دوست بھی چاہتے ہیں کہ دونوں جماعتوں کے درمیان فاصلے نہ بڑھیں اور تمام معاملات افہام و تفہیم سے طے پائیں۔
ملاقات کے دوران وزیر داخلہ نے وفاقی حکومت کا پیغام بھی بلاول بھٹو کو پہنچایا۔ خیال رہے کہ حالیہ دنوں میں پیپلز پارٹی کی مرکزی قیادت کے اجلاس میں پارٹی کے کئی اراکین نے ن لیگ کی حکومتی پالیسیوں اور خاص طور پر پنجاب حکومت کے طرزِ حکمرانی پر تحفظات کا اظہار کیا تھا۔
اندرونی ذرائع کا کہنا ہے کہ سابق صدر آصف علی زرداری نے ان تحفظات کے باوجود موجودہ حکومت یا مسلم لیگ ن کے خلاف کسی بھی سخت فیصلے سے گریز کا مشورہ دیا تھا۔ ان کا کہنا تھا کہ انہیں کچھ وقت دیا جائے تاکہ تمام امور خوش اسلوبی سے حل کیے جا سکیں۔