خادمِ حرمین شریفین شاہ سلمان بن عبدالعزیز نے ایک اہم انسانی قدم اٹھاتے ہوئے 200 سعودی شہریوں کو ’’کنگ عبدالعزیز میڈل ‘‘(تھرڈ کلاس) سے نوازنے کی منظوری دے دی ہے۔ یہ اعزاز ان افراد کو دیا جائے گا جنہوں نے جذبۂ انسانیت کے تحت اپنے اعضا عطیہ کیے۔
سعودی میڈیا کے مطابق، یہ فیصلہ انسانی ہمدردی، ایثار اور معاشرتی شعور کو سراہنے کے لیے کیا گیا ہے، تاکہ دیگر شہریوں کو بھی اعضا عطیہ کرنے کی ترغیب دی جا سکے۔
اعداد و شمار کے مطابق، سعودی عرب میں2024 کے دوران اعضا عطیہ کرنے کی شرح میں نمایاں اضافہ دیکھنے میں آیا ہے اور اب یہ شرح 4.9 فیصد تک پہنچ چکی ہے، جو کہ ایک مثبت سماجی تبدیلی کی علامت ہے۔
اس وقت مملکت میں31 فعال پیوندکاری مراکز قائم ہیں، جن میں سے 55 فیصد صرف گردوں کی پیوندکاری سے متعلق ہیں۔ اس کے علاوہ جگر، دل، پھیپھڑوں، لبلبہ اور آنتوں کی پیوندکاری کے لیے بھی مخصوص اور جدید سہولیات سے آراستہ مراکز موجود ہیں۔
یہ شاہی فیصلہ نہ صرف اعضا عطیہ کرنے والوں کی قربانی کو خراج تحسین ہے بلکہ پورے معاشرے میں زندگی بچانے کے جذبے کو فروغ دینے کی ایک بڑی کوشش بھی ہے۔