انسداد دہشتگردی کی خصوصی عدالت نے کراچی ایئرپورٹ خودکش حملے میں ملوث دہشتگردوں کی مالی معاونت کے مقدمے میں مفرور ملزمان کو اشتہاری قرار دینے کی کارروائی شروع کرنے** کا حکم دے دیا۔
کراچی سینٹرل جیل کے انسداد دہشتگردی کمپلیکس میں سماعت کے دوران، جیل حکام نے ملزم سعیدکو عدالت میں پیش کیا، جبکہ ضمانت پر رہا نجی بینک مینجر بلال بھی عدالت میں پیش ہوئے۔
عدالت نے کیس کے تفتیشی افسر سے 30 اکتوبر تک رپورٹ طلب کرلی اور مقدمے کے مفرور ملزمان کے خلاف کارروائی شروع کرنے کی ہدایت کی۔
پراسیکیوشن کے مطابق مفرور ملزمان میں کالعدم تنظیم کے کمانڈر بشیر بلوچ عرف بشیر زیب اور عبد الرحمان عرف رحمان گل شامل ہیں۔
ملزم سعید نے خودکش حملے میں استعمال ہونے والی گاڑی کی خریداری کے لیے 1 لاکھ روپے فراہم کیے تھے۔ نجی بینک مینجر بلال بھی ملزمان میں شامل ہیں، جنہوں نے خودکش حملہ آور شاہ فہد کو گاڑی کی خریداری میں سہولت فراہم کی۔
ملزمان کے خلاف دہشتگردوں کی مالی معاونت اور سہولت کاری کے الزامات ہیں، اور عدالت نے مفرور ملزمان کے اشتہاری قرار دینے کی کارروائی شروع کر دی ہے۔