مشرقی وسطی بحیرہ عرب میں موجود ہوا کا کم دباؤ کراچی کے مزید قریب آ گیا ہے۔ محکمہ موسمیات کے مطابق، یہ سسٹم اس وقت کراچی سے تقریباً 810 کلومیٹر اور بھارتی ریاست گجرات سے 430 کلومیٹر کے فاصلے پر موجود ہے۔
محکمہ موسمیات نے اس صورتحال پر نظر رکھتے ہوئے آٹھواں ٹروپیکل سائیکلون واچ الرٹ جاری کر دیا ہے۔ رپورٹ کے مطابق، دباؤ گزشتہ 24 گھنٹوں کے دوران شمال مشرق کی سمت بڑھا ہے اور آئندہ 24 گھنٹوں میں بھی اسی سمت میں حرکت کرنے کا امکان ہے۔
محکمہ موسمیات کا کہنا ہے کہ اس سسٹم کے اثرات کے باعث تھرپارکر کے چند علاقوں میں ہلکی بارش یا بوندا باندی ہو سکتی ہے۔ تاہم فی الحال پاکستان کے کسی ساحلی علاقے کو کوئی خطرہ نہیں۔
کراچی میں واقع سائیکلون وارننگ سینٹر بحیرہ عرب میں موجود اس موسمی نظام پر مسلسل نظر رکھے ہوئے ہے اور صورتِ حال میں کسی بھی تبدیلی پر بروقت آگاہ کیا جائے گا۔