راولپنڈی (نیوزڈیسک)انسداد دہشت گردی عدالت راولپنڈی میں علیمہ خان کیخلاف چھبیس نومبر احتجاج کیس میں مسلسل غیرحاضری کے باعث دوبارہ بلاضمانت وارنٹ گرفتاری جاری کر دیئے گئے ۔

علیمہ خان کی پنجاب میں جائیدادوں سے متعلق بورڈ آف ریونیو کی رپورٹ عدالت میں پیش کی گئی۔ بانی پی ٹی آئی کی ہمشیرہ پنجاب کے چار اضلاع میں 338 کنال اراضی کی مالک نکلیں ۔ رپورٹ کےمطابق علیمہ خان بھکر میں 51 کنال سولہ مرلے پراپرٹی کی مالک ہیں ۔ ان کی لاہور کے موضع میاں میر میں ایک کنال چار مرلے جائیداد ہے ۔ موضع نور پور میں ایک کنال ایک مرلہ پراپرٹی ۔ موضع سلطان رائے ونڈ میں بھی چونسٹھ کنال چودہ مرلے اراضی ہے ۔

علیمہ خان ضلع میانوالی میں 217 کنال پانچ مرلے اور شیخوپورہ میں چار کنال تیرہ مرلے کی مالکن ہیں ۔ پراسیکیوٹر ظہیر شاہ نے کہا اشتہاری ہونے پر علیمہ خان کی جائیداد منجمد یا اٹیچ کی جا سکتی ہے ۔

عدالت کو یہ بھی بتایا گیا کہ علیمہ خان کے اے بی ایل میں 7 اور یو بی ایل کے 15 بینک اکاؤنٹ منجمد کرنے کی ہدایت کر دی گئی ہے ۔ ان کے پہلے سے بھی پندرہ بینک اکاؤنٹ منجمد ہیں ۔ جج امجد علی شاہ نے عدالتی احکامات پر عملدرآمد نہ کروانے پر چیئرمین سی ڈی اے اور چیف کمشنر اسلام آباد کے بھی ناقابل ضمانت وارنٹ گرفتاری جاری کر دیئے اور آئی جی اسلام آباد کو وارنٹس کی تعمیل کروانے کی ہدایت کر دی ۔ کیس کی سماعت 20 نومبر تک ملتوی کر دی گئی ۔