نجی ٹی وی کے کامیڈی شو میزبان و معروف اسٹینڈ اپ کامیڈین تابش ہاشمی نے اپنے نام سے متعلق دلچسپ انکشاف کیا ہے۔
حال ہی میں میزبان نے اپنے پروگرام ہنسنا منع ہے میں معروف ہدایت کار و اداکار احتشام الدین کو مدعو کیا۔
دورانِ شو تابش ہاشمی نے مہمان احتشام الدین کا تعارف کروایا، جس پر ہدایت کار نے انکشاف کیا کہ ان کا مکمل نام ’محمد احتشام الدین‘ نہیں ہے بلکہ یہ مختصر نام ہے۔
تابش ہاشمی نے شاہ زیب خانزادہ کی سیٹ سنبھال لی
اداکار و ہدایت کار کا کہنا تھا کہ چونکہ میرے والدین کا تعلق حیدر آباد دکن سے ہے تو وہاں سب کے 2 نام ہوتے ہیں، ایک دستاویزی نام اور ایک گھر کا نام، تو مجھے گھر پر سب ’اطہر پاشا‘ کہتے ہیں۔
احتشام الدین کی جانب سے اس دلچسپ انکشاف کے بعد تابش ہاشمی نے بھی اپنے دوسرے نام سے پردہ اُٹھا دیا۔
انہوں نے اپنے مزاحیہ انداز میں بتایا کہ ایسا کیوں تھا، میرے والد و تایا کے بھی 2، 2 نام تھے۔ میرے بھی 2 نام ہیں، میں نے یہ آج تک کسی کو بتایا نہیں آج اس راز سے پردہ اُٹھا رہا ہوں کہ میرا ایک نام تو ’تابش احمد ہاشمی‘ ہے، جو شناختی کارڈ پر بھی ہے اور گھر میں بھی اسی نام سے پکارتے ہیں۔
میزبان نے مزید کہا کہ اس نام کے علاوہ میرا ایک اور نام رکھا گیا تھا، جو کہ ’فخر السلام ہاشمی‘ تھا، لیکن پھر گھر والوں نے سوچا کہ نہ اسلام کو اس پر فخر ہو نہ ہمیں، اس لیے میرا نام تبدیل کردیا گیا۔
