بھارتی میڈیا نے دبئی ایئر شو میں بھارتی فضائیہ کے لڑاکا طیارے تیجس کے حادثے کا الزام امریکا پر عائد کر دیا ہے۔ بھارتی سابق میجر جنرل جی ڈی بخشی اور مشہور اینکر ارنب گوسوامی نے اس حادثے کی ذمہ داری امریکی انجن پر ڈالنے کی کوشش کی ہے۔
ارنب گوسوامی نے دعویٰ کیا کہ امریکا سے جی ای 404 انجن کی فراہمی میں تاخیر نے بھارت کی دفاعی تیاریوں میں خلل ڈال دیا، اور امریکی حکومت نے جان بوجھ کر تیجس کے انجنوں کی ڈلیوری سست کرنے کی کوشش کی۔ گوسوامی کے مطابق، امریکا کو لائٹ کومبیٹ ائیرکرافٹ (ایل سی اے) پروگرام اور تیجس کی ترقی سے خطرہ محسوس ہوتا ہے، کیونکہ یہ طیارہ جنرل الیکٹرک کے انجنوں پر چلتا ہے، جو بھارت کا “کبھی دوست نہیں رہا”۔
اس کے علاوہ، بھارتی سابق میجر جنرل جی ڈی بخشی نے بھی انجن کی فراہمی کی تاخیر پر تنقید کرتے ہوئے کہا کہ جی ای 404 انجن بھارت کو دو سال پہلے مل جانا چاہیے تھا۔ انہوں نے کہا کہ بھارت نے اس کے لیے ایک ارب ڈالر نقد ادا کیے تھے، لیکن اب تک بھارت کو صرف 2 انجن ہی ملے ہیں۔
اس دوران، بھارتی میڈیا میں اس بات پر بھی بحث کی جا رہی ہے کہ تیجس کے حوالے سے 53 اہم خامیوں کی نشاندہی کی گئی ہے، جس کا ذکر حالیہ آڈٹ رپورٹ میں کیا گیا۔
یاد رہے کہ گزشتہ روز دبئی ایئر شو میں بھارتی فضائیہ کا لڑاکا طیارہ تیجس ایک فضائی مظاہرے کے دوران گر کر تباہ ہو گیا، جس کے نتیجے میں پائلٹ کی ہلاکت ہو گئی۔ حادثے کے فوراً بعد ریسکیو اور فائر فائٹنگ ٹیمیں جائے وقوع پر پہنچیں اور امدادی کارروائیاں شروع کر دیں۔