اسلام آباد:(نیوزڈیسک) سانحۂ آرمی پبلک سکول پشاور کے شہداء کی گیارھویں برسی کے موقع پر صدرِ پاکستان آصف علی زرداری اور وزیراعظم محمد شہباز شریف نے شہداء کو خراجِ عقیدت پیش کیا ہے۔ دونوں رہنماؤں نے کہا ہے کہ اے پی ایس کے معصوم بچوں، اساتذہ اور عملے کی قربانیاں قوم کبھی فراموش نہیں کرے گی اور یہ عظیم قربانیاں ہمیشہ قومی یادداشت کا حصہ رہیں گی۔ انہوں نے اس عزم کا اعادہ کیا کہ پاکستان کی سرزمین سے دہشت گردی کا مکمل خاتمہ ہی سانحہ اے پی ایس کا حقیقی انصاف ہے اور دہشت گردی کے خلاف جدوجہد ابھی ختم نہیں ہوئی۔

صدرِ پاکستان آصف علی زرداری نے اپنے بیان میں کہا کہ اے پی ایس کے معصوم بچوں کی قربانی قوم کبھی فراموش نہیں کرے گی۔ انہوں نے کہا کہ دہشت گردوں، ان کے سہولت کاروں اور مالی معاونین سے کوئی نرمی نہیں ہوگی اور ریاست کے خلاف ہتھیار اٹھانے والوں سے کسی قسم کی بات چیت ممکن نہیں۔ صدر مملکت نے بھارتی سرپرستی میں دہشت گردی کی سخت مذمت کرتے ہوئے کہا کہ پاکستان دشمن عناصر کو بے نقاب کرتا رہے گا۔ انہوں نے سکیورٹی فورسز اور قانون نافذ کرنے والے اداروں کو خراجِ تحسین پیش کرتے ہوئے کہا کہ ہر دہشت گرد اور اس کے سہولت کار کا پیچھا کیا جائے گا اور امن کے دشمنوں کو کبھی کامیاب نہیں ہونے دیا جائے گا۔ صدر آصف علی زرداری نے کہا کہ اے پی ایس شہداء کی یاد ہمارے عزم کو مزید مضبوط کرتی ہے۔

وزیراعظم محمد شہباز شریف نے اپنےپیغام میں کہا ہےکہ آج ہم سانحۂ آرمی پبلک سکول پشاور کے شہداء کو خراجِ عقیدت پیش کرتے ہیں جنہوں نے وطنِ عزیز کے مستقبل کے لیے اپنی قیمتی جانوں کا نذرانہ پیش کیا۔ انہوں نے کہا کہ یہ دلخراش سانحہ پوری قوم کے لیے ایک عظیم آزمائش تھا جس نے دلوں کو غم سے بھر دیا مگر ہمارے حوصلے پست نہ کر سکا۔ وزیراعظم نے کہا کہ اے پی ایس کے معصوم بچوں، اساتذہ اور عملے کی قربانیاں ہمیشہ قومی یادداشت کا حصہ رہیں گی اور پاکستان کی سرزمین سے دہشت گردی کا مکمل خاتمہ ہی اس سانحے کا حقیقی انصاف ہے۔

وزیراعظم نے کہا کہ آج جب ملک ایک بار پھر دہشت گردی کے ناسور کا سامنا کر رہا ہے تو سانحۂ اے پی ایس ہمیں یاد دلاتا ہے کہ دہشت گردی کے خلاف ہماری جدوجہد جاری ہے۔ انہوں نے اس عہد کی تجدید کی کہ زیرو ٹالرنس کی پالیسی کے تحت پوری قوت کے ساتھ کارروائیاں جاری رکھی جائیں گی اور آخری دہشت گرد کے خاتمے تک چین سے نہیں بیٹھیں گے۔ وزیراعظم نے کہا کہ پاکستان کے روشن مستقبل کے لیے دی گئی یہ عظیم قربانیاں ہرگز رائیگاں نہیں جائیں گی۔