لاہور(نیوزڈیسک)پنجاب حکومت کی جانب سے فلم انڈسٹری کے فروغ کے لیے ’پنجاب فلم ڈویلپمنٹ اتھارٹی‘ تشکیل دینے کا فیصلہ کیا گیا ہے۔
بروز جمعہ پنجاب اسمبلی کے اجلاس کے دوران پنجاب فلم ڈویلپمنٹ اتھارٹی ایکٹ 2025ء بل پیش کیا گیا۔
بل کے متن کے مطابق پنجاب فلم ڈویلپمنٹ اتھارٹی سے فلم سازی، ڈرامہ، ڈاکیومنٹری کی سرپرستی کی جائے گی۔
بل کے متن میں کہا گیا کہ نئی فلم پالیسی، قواعد وضوابط اور لائسنسنگ کا جامع نظام متعارف کروایا جائے گا جس سے فلم سازوں کو سہولتیں، اجازت ناموں اور ون ونڈو آپریشن کی سہولت ملے گی، مقامی اور غیرملکی سرمایہ کاری کے فروغ کے لیے خصوصی مراعات دی جائیں گی، فلم اسٹوڈیوز، فلم سٹی اور پوسٹ پروڈکشن سہولتوں کے قیام کی راہ ہموار ہوگی۔
بل کے متن کے مطابق فلم انڈسٹری کے لیے فنڈنگ، گرانٹس اور سبسڈی کا نظام بھی متعارف کروایا جائے گا، اتھارٹی فلم انڈسٹری سے متعلق شکایات اور مسائل کے حل کی مجاز ہوگی، بل 2 ماہ کے لیے متعلقہ کمیٹی کے حوالے کر دیا گیا، کمیٹی 2 ماہ میں رپورٹ پیش کرے گی۔
بل پنجاب اسمبلی سے منظور کروایا جائے گا جبکہ حتمی منظوری گورنر پنجاب دیں گے۔
