اسلام آباد (نیوز ڈیسک) وزیراعظم شہباز شریف نے کہا کہ وہ تمام شرکاء، بھائیوں اور بہنوں کو خوش آمدید کہتے ہیں اور ان کی آمد پر شکریہ ادا کرتے ہیں۔ وزیراعظم نے ایشیا کپ 2019 میں پاکستان کی بھارت کے خلاف کامیابی پر قوم کو مبارکباد دیتے ہوئے امید ظاہر کی کہ پاکستانی کرکٹ ایک بار پھر اپنے سنہرے دور کی یادیں تازہ کرے گی۔

کابینہ کے اجلاس سے خطاب کرتے ہوئےوزیراعظم نے کہا کہ آج پی آئی اے کی نجکاری کے حوالے سے ایک اہم دن ہے، جس کے لیے کابینہ، متعلقہ حکومتی اداروں اور افسران نے بھرپور محنت کی۔ انہوں نے وزیر دفاع، وزارتِ خزانہ، نجکاری کمیشن اور اس کے مشیر محمد علی کی خصوصی کاوشوں کو سراہتے ہوئے کہا کہ یہ اجتماعی محنت کا نتیجہ ہے۔

انہوں نے وضاحت کی کہ بولی کے عمل کو مکمل طور پر شفاف اور ٹرانسپیرنٹ بنایا گیا ہے۔ بولی کے دوران سی تھرو باکسز استعمال کیے جائیں گے اور میڈیا کو ہدایت دی گئی ہے کہ حساس لمحات میں براہِ راست نشریات روک دی جائیں۔ قیمت فائنل ہونے کے بعد بکس کھولے جائیں گے اور سب سے زیادہ بولی دینے والے کو کامیاب قرار دیا جائے گا۔ وزیراعظم کے مطابق یہ پاکستان کی تاریخ کا سب سے بڑا نجکاری لین دین ہو سکتا ہے، جس کے بعد تمام مراحل کی منظوری کے لیے معاملہ فوری طور پر کابینہ کے سامنے لایا جائے گا۔

وزیراعظم نے مزید کہا کہ اگر نجکاری کا عمل کامیابی سے مکمل ہو گیا تو اسے پوری کابینہ کی اجتماعی منظوری سے حتمی شکل دی جائے گی۔ انہوں نے پی ایس ای میں عبدالعزیز کی کارکردگی کو سراہتے ہوئے کہا کہ یہ کسی ایک فرد کا نہیں بلکہ پوری قوم کا اعزاز ہے۔

سیاسی صورتحال پر بات کرتے ہوئے وزیراعظم نے کہا کہ پی ٹی آئی اور دیگر جماعتوں کے ساتھ مکالمے کی باتیں سامنے آ رہی ہیں۔ انہوں نے واضح کیا کہ حکومت پہلے بھی مذاکرات کی دعوت دے چکی ہے اور اب بھی تیار ہے، کیونکہ ملک کی ترقی اور خوشحالی کے لیے تمام سیاسی قوتوں کا ہم آہنگ ہونا ضروری ہے۔ تاہم وزیراعظم نے زور دیا کہ مذاکرات کی آڑ میں غیر قانونی دباؤ یا بلیک میلنگ قابلِ قبول نہیں ہوگی، صرف آئین و قانون کے دائرے میں رہتے ہوئے ہی بات آگے بڑھ سکتی ہے۔