برازیل کی تاریخ کی پہلی مس یونیورس، آئیدا ماریا وارگاس، انتقال کر گئیں۔ مقامی میڈیا کے مطابق انہیں اسپتال آرکانجو سائو میگوئل میں داخل کیا گیا تھا، تاہم ان کی موت کی وجوہات تاحال واضح نہیں ہو سکیں۔
آئیدا ماریا کے خاندان اور بیٹی فرننڈا وارگاس نے بھی اس خبر کی تصدیق کی ہے۔ رپورٹس کے مطابق وہ 1963 تک آئی سی یو میں زیرِ علاج رہیں۔
آئیدا ماریا وارگاس 31 دسمبر 1944 کو پورٹو الیگرے میں پیدا ہوئیں۔ صرف 17 سال کی عمر میں، 1962 میں، انہوں نے ریو گرانڈے دو سول کے سوئمنگ پولز کے مقابلے میں حصہ لیا اور رانی کا تاج جیتا۔ اگلے سال، وہ مس پورٹو الیگرے اور مس برازیل کے خطاب بھی حاصل کر چکی تھیں۔ 1963 میں میامی بیچ، امریکا میں منعقدہ مس یونیورس مقابلے میں انہوں نے برازیل کے لیے پہلی بار تاج جیتا۔ اس موقع پر آئیدا نے کہا تھا کہ وہ جیتنے کے لیے تیار نہیں تھیں، لیکن سکون اور حوصلے نے انہیں کامیابی دلائی۔
آئیدا وارگاس نے ماڈلنگ کے علاوہ کاروبار، آرٹ کیوریٹر اور ٹیلی ویژن پیش کنندہ کے طور پر بھی خدمات انجام دیں۔ 1968 میں وہ برازیل واپس آئیں اور پورٹو الیگرے میں مقیم ہو گئیں۔ انہوں نے بزنس مین جوز کارلوس ایتھانسیو سے شادی کی اور ان کے دو بچے اینزو اور فرننڈا ہوئے۔ 2000 میں انہیں اسٹروک کا سامنا کرنا پڑا اور 2009 میں ان کے شوہر کا انتقال ہوا، جس کے بعد وہ گرامادو منتقل ہو گئیں۔
مس یونیورس آرگنائزیشن نے انسٹاگرام پر آئیدا وارگاس کو خراج تحسین پیش کرتے ہوئے کہا:
برازیل کی پہلی مس یونیورس کے طور پر آئیدا ماریا وارگاس کی شخصیت اور پیشہ ورانہ سفر نے ہماری تاریخ میں لازوال اثر چھوڑا۔ ہم دعاگو ہیں کہ ان کی میراث آنے والی نسلوں کو متاثر کرتی رہے۔”