لاہور میں صوبائی نیشنل ایکشن پلان کمیٹی کا اجلاس محکمہ داخلہ میں ہوا، جس میں پنجاب حکومت نے دہشتگردی، انتہا پسندی اور جرائم کے خاتمے کے لیے تمام صوبائی اداروں کے ساتھ مشترکہ کارروائی پر اتفاق کیا۔
ذرائع کے مطابق اجلاس میں فیصلہ کیا گیا کہ ریوائزڈ نیشنل ایکشن پلان کے تحت مکمل عملدرآمد یقینی بنایا جائے گا، جس میں پولیس، سی ٹی ڈی، اسپیشل برانچ اور دیگر حساس اداروں کو انٹیلیجنس بیسڈ آپریشنز مزید موثر بنانے کی ہدایات دی گئیں۔
دہشت گرد تنظیموں، سہولت کاروں اور مالی معاونین کے خلاف بلا تفریق کارروائی کی منظوری دی گئی ہے۔ غیر قانونی اسلحہ، دھماکہ خیز مواد اور ایل پی جی کے غیر قانونی کاروبار کے خلاف سخت کریک ڈاؤن کرنے کا بھی فیصلہ کیا گیا ہے۔
ذرائع کے مطابق پیٹرول پمپس، گیس ایجنسیوں اور دھماکہ خیز مواد کی نقل و حرکت کی ڈیجیٹل مانیٹرنگ بھی شروع کی جائے گی، جبکہ سیف سٹیز منصوبے کو تمام بڑے شہروں اور اہم شاہراہوں تک وسعت دی جائے گی۔
موٹرویز اور قومی شاہراہوں پر جدید کیمرے اور انٹیلیجنس سسٹم کے ذریعے نگرانی بڑھانے کا بھی فیصلہ کیا گیا ہے۔ پنجاب میں بھیک مافیا کے خلاف مربوط آپریشنز اور بیرون ملک جانے والے افراد کی سخت جانچ کا نظام نافذ کیا جائے گا، اور بھیک یا منظم گداگری میں ملوث عناصر کے خلاف ایف آئی اے اور پولیس کی مشترکہ کارروائیاں شروع ہوں گی۔
ذرائع کے مطابق اسمگلنگ، منشیات اور پاور تھیفٹ کے نیٹ ورکس توڑنے کے لیے زیرو ٹالرنس پالیسی اپنائی جائے گی، اور ایکسائز، کسٹمز، اینٹی نارکوٹکس اور پولیس کے درمیان مشترکہ ڈیٹا شیئرنگ کا نظام قائم کیا جائے گا۔
دریائے سندھ پر قائم پلوں پر ڈیجیٹل انفورسمنٹ اسٹیشنز کے قیام پر بھی عملدرآمد شروع کیا جائے گا۔ غیر ملکی شہریوں، خاص طور پر چینی باشندوں کی سکیورٹی کے لیے اسپیشل پروٹیکشن یونٹ کو مزید اختیارات دیے گئے ہیں۔
تمام سب کمیٹیوں کی سفارشات منظور کی گئی ہیں، اور ان پر واضح اہداف اور ٹائم لائنز کے ساتھ عملدرآمد کی ہدایات جاری کی گئی ہیں۔ حکومت پنجاب کی یہ کوشش ریاستی رٹ کو مضبوط کرنے اور امن و امان برقرار رکھنے کے لیے اہم قدم ہے۔