وفاقی وزیر تعلیم خالد مقبول صدیقی کا کہنا ہے کہ گل پلازہ میں لگنے والی آگ کے حوالے سے فی الحال یہ کہنا ممکن نہیں کہ یہ حادثہ تھا یا کسی نے جان بوجھ کر آگ لگائی۔ ان کے مطابق واقعے کی وجوہات جاننے کے لیے تحقیقات جاری ہیں۔
لاہور میں نیشنل کالج آف آرٹس کے دورے کے موقع پر میڈیا سے گفتگو کرتے ہوئے خالد مقبول صدیقی نے واضح کیا کہ ایم کیو ایم نے کبھی بھی 18ویں آئینی ترمیم کو واپس لینے کا مطالبہ نہیں کیا۔ ان کا کہنا تھا کہ دنیا تیزی سے بدل رہی ہے، مگر بدقسمتی سے ہم خود کو اس رفتار کے مطابق ہم آہنگ نہیں کر سکے۔
وفاقی وزیر نے سندھ کی سیاسی صورتحال پر بات کرتے ہوئے کہا کہ صوبے میں گزشتہ 17 برس سے ایک ہی جماعت مکمل اختیارات کے ساتھ برسرِ اقتدار ہے، جبکہ سندھ کے بجٹ میں 97 فیصد حصہ کراچی فراہم کرتا ہے۔
انہوں نے کہا کہ کراچی کو مسائل کا ذمہ دار ٹھہرانا درست نہیں، کیونکہ نہ چور کراچی کا ہے اور نہ ہی سپاہی۔ خالد مقبول صدیقی کے مطابق ایم کیو ایم کا کوئی بھی مطالبہ آئین سے متصادم نہیں بلکہ یہ شہری حقوق اور وسائل کی منصفانہ تقسیم سے متعلق ہے۔