کراچی کے شہریوں کے لیے ایک بڑی خوشخبری سامنے آئی ہے۔ کراچی میونسپل کارپوریشن (کے ایم سی) نے شہر بھر میں 418 سڑکوں کی ازسرِ نو تعمیر کا فیصلہ کر لیا ہے، جس کا مقصد شہر کے انفرااسٹرکچر کو بہتر بنانا اور عوام کو بہتر سفری سہولیات فراہم کرنا ہے۔
ترجمان کے ایم سی کے مطابق یہ فیصلہ میئر کراچی مرتضیٰ وہاب کی زیرِ صدارت محکمہ انجینئرنگ کے اجلاس میں کیا گیا۔ اجلاس کے دوران میئر کراچی نے بتایا کہ حکومت کی جانب سے فنڈز کی منظوری کا عمل جاری ہے، اس لیے متعلقہ محکموں کو ہدایت دی گئی ہے کہ ٹینڈرز جلد از جلد جاری کیے جائیں تاکہ ترقیاتی کام فوراً شروع ہو سکیں۔
مرتضیٰ وہاب کا کہنا تھا کہ ان کی کوشش ہے کہ شہر کا انفرااسٹرکچر تیزی سے بہتر ہو اور کراچی کے عوام اس بہتری کو اپنی روزمرہ زندگی میں محسوس کریں۔ انہوں نے مزید بتایا کہ چیئرمین پیپلز پارٹی بلاول بھٹو زرداری کی خصوصی ہدایت پر کراچی کے لیے ایک خصوصی پیکیج اور اضافی فنڈز فراہم کیے جا رہے ہیں تاکہ شہر کے دیرینہ مسائل حل کیے جا سکیں۔
اجلاس میں جاری ترقیاتی منصوبوں کا بھی جائزہ لیا گیا۔ میئر کراچی نے میونسپل کمشنر سمیرا حسین کو ہدایت دی کہ تمام منصوبوں میں بیوٹیفکیشن کو بھی شامل رکھا جائے، تاکہ شاہراہیں صرف مکمل ہی نہ ہوں بلکہ دیکھنے میں بھی خوبصورت ہوں۔
اس موقع پر مشیرِ مالیات گلزار ابڑو نے 418 سڑکوں کی نئی تعمیر سے متعلق تفصیلی بریفنگ دی اور مجوزہ منصوبے کی پیش رفت سے آگاہ کیا۔