لاہور میں پولیس نے شادی کا جھانسہ دے کر ایک لڑکی کو زیادتی کا نشانہ بنانے والے ملزم کو گرفتار کر لیا ہے۔
پولیس ترجمان کے مطابق گڑھی شاہو تھانے کے ایس ایچ او سہیل احمد نے اپنی ٹیم کے ہمراہ کارروائی کرتے ہوئے ملزم کو حراست میں لیا۔ ابتدائی تحقیقات میں سامنے آیا ہے کہ ملزم نے تقریباً دو ہفتے قبل آئی ایم او ایپ کے ذریعے متاثرہ لڑکی سے دوستی کی، اعتماد حاصل کیا اور ملاقات کے بہانے بلا کر زیادتی کا ارتکاب کیا۔
پولیس کا کہنا ہے کہ واقعے کے بعد جب لڑکی نے شادی کے لیے رابطہ کیا تو ملزم نے اسے دھمکیاں دیں اور اپنا نمبر بلاک کر دیا۔ متاثرہ لڑکی کی شکایت پر ملزم وقاص کے خلاف مقدمہ درج کر کے اسے جینڈر سیل کے حوالے کر دیا گیا ہے۔
ایس پی سول لائنز چوہدری اثر علی نے واضح کیا کہ خواتین کا استحصال کرنے والے افراد کسی بھی قسم کی رعایت کے مستحق نہیں اور ایسے ملزمان کے خلاف قانون کے مطابق سخت کارروائی عمل میں لائی جائے گی۔