وفاقی وزیر صحت مصطفیٰ کمال نے کہا ہے کہ ماہرین کے مطابق 70 فیصد بیماریاں آلودہ پانی کے استعمال کی وجہ سے پھیلتی ہیں، اور اگر صاف پانی فراہم کیا جائے تو بیماریوں میں نمایاں کمی لائی جا سکتی ہے۔
اسلام آباد میں ایک تقریب سے خطاب کرتے ہوئے وزیر صحت نے نرسنگ کے شعبے کی اہمیت پر زور دیا اور کہا کہ اسپتالوں میں ڈاکٹروں کا مریض سے رابطہ مختصر ہوتا ہے، اس لیے نرسیں مریضوں کے ساتھ خوش اخلاقی اور احترام کے ساتھ پیش آئیں۔
انہوں نے مزید کہا کہ اچھے کاموں کا اجر مرنے کے بعد بھی جاری رہتا ہے، اور صحت کے شعبے میں بہتری کے لیے حکومت اور نجی شعبے کو مل کر کردار ادا کرنا ہوگا۔ مصطفیٰ کمال نے کہا کہ دکھی انسانیت کی خدمت بہترین عمل ہے، اور ہیلتھ کیئر کا اصل مقصد انسان کو مریض بننے سے بچانا ہے۔
وزیر صحت نے ملک میں بے ہنگم آبادی کے مسئلے پر بھی بات کی اور کہا کہ وسائل کے مطابق آبادی کو کنٹرول کرنا ضروری ہے، کیونکہ ہر سال پاکستان میں تقریباً 61 لاکھ بچے پیدا ہو رہے ہیں۔
انہوں نے والدین سے بچوں کو 13 بیماریوں کی ویکسینیشن کرانے کی تاکید کی اور یاد دلایا کہ پاکستان دنیا کے دو ایسے ممالک میں سے ہے جہاں پولیو ابھی بھی ختم نہیں ہوا، اور گزشتہ سال ملک میں پولیو کے 30 کیسز رپورٹ ہوئے۔