اسلام آباد(طارق محمود سمیر)پاکستان حالیہ عرصے میں اپنی مؤثر اور متوازن سفارتکاری کے باعث عالمی سطح پر ایک ذمہ دار اور قابلِ اعتماد ملک کے طور پر سامنے آ رہا ہے۔ سیاسی اور عسکری سطح پر اپنائی گئی حکمتِ عملی نے نہ صرف خطے میں کشیدگی کم کرنے میں مدد دی بلکہ عالمی امن و استحکام کے لیے پاکستان کے کردار کو بھی نمایاں کیا ہے۔
امریکی نمائندہ خصوصی برائے مشرق وسطیٰ Steve Witkoff نے بھی پاکستان کی اس کاوش کو سراہتے ہوئے اسے ایک مؤثر ثالث قرار دیا ہے۔ انہوں نے امریکی کابینہ میں پاکستان کی سفارتی کامیابیوں کا اعتراف کرتے ہوئے انکشاف کیا کہ امن معاہدے کے فریم ورک کے لیے تیار کی گئی 15 نکاتی ایکشن لسٹ پاکستان کے ذریعے ایران تک پہنچائی گئی۔ یہ پیش رفت اس بات کا ثبوت ہے کہ پاکستان کو حساس عالمی معاملات میں اعتماد کے ساتھ ایک پل کا کردار دیا جا رہا ہے۔
Steve Witkoff کے مطابق پاکستان نہ صرف امریکا اور ایران کے درمیان رابطے کا ذریعہ بن رہا ہے بلکہ اس کے ذریعے مثبت اور تعمیری پیغامات کا تبادلہ بھی ممکن ہوا ہے۔ ان کا کہنا تھا کہ پاکستان خطے میں کشیدگی کم کرنے اور مذاکرات کو آگے بڑھانے میں ایک اہم ثالث کے طور پر اپنا کردار ادا کر رہا ہے۔
عالمی ماہرین بھی اس بات پر متفق ہیں کہ پاکستان کی مدبرانہ پالیسیوں اور متوازن حکمتِ عملی نے ایک ممکنہ بڑی جنگ کے خطرے کو کم کرنے میں اہم کردار ادا کیا ہے۔ ان کے مطابق اگر امریکا اور ایران کے درمیان تنازع شدت اختیار کرتا تو اس کے اثرات پوری دنیا پر مرتب ہوتے، تاہم پاکستان کی بروقت سفارتکاری نے صورتحال کو سنبھالنے میں مدد دی۔
ماہرین کا یہ بھی کہنا ہے کہ پاکستان کا یہ ثالثی کردار اس کی بڑھتی ہوئی عالمی اہمیت اور اس پر کیے جانے والے اعتماد کا واضح اظہار ہے۔ متوازن خارجہ پالیسی، علاقائی روابط اور سیاسی و عسکری سطح پر مربوط حکمتِ عملی نے پاکستان کی عالمی ساکھ کو مزید مضبوط کیا ہے، اور وہ تیزی سے عالمی امن کے قیام میں ایک کلیدی کردار ادا کرنے والے ملک کے طور پر ابھر رہا ہے۔