اسلام آباد(نیوزڈیسک) پاکستان تحریک انصاف (پی ٹی آئی) نے سینیٹ کی خالی نشست کے لیے عرفان سلیم کو اپنا امیدوار نامزد کر دیا ہے۔

یہ نشست مراد سعید کی نااہلی کے بعد خالی ہوئی تھی، پارٹی کے پارلیمانی بورڈ نے مختلف ناموں پر غور کے بعد عرفان سلیم کے نام کی منظوری دی۔

پی ٹی آئی اعلامیے کے مطابق سینیٹ کی نشست کے لیے مجموعی طور پر 54 امیدواروں نے پارٹی کو کاغذات جمع کروائے تھے، جن میں سے حتمی طورپرعرفان سلیم کا انتخاب کیا گیا، اس کے علاوہ سجاد مہمند، غلام بادشاہ اورسردارخان کو کورننگ امیدواروں کے طورپررکھا گیا ہے۔

ذرائع کے مطابق اس حوالے سے پارلیمانی بورڈ کا اہم اجلاس گزشتہ رات خیبرپختونخوا ہاؤس اسلام آباد میں منعقد ہوا، جہاں سینیٹ امیدوار کے نام پرتفصیلی مشاورت کی گئی، اجلاس میں دیگرناموں پر بھی غورکیا گیا، جن میں فیض الرحمان کا نام بھی شامل تھا۔

ذرائع نے بتایا کہ بورڈ کے سامنے یہ رائے بھی رکھی گئی کہ عرفان سلیم کا نام 9 مئی کے واقعات سے جوڑا جاتا ہے جبکہ فیض الرحمان نے پارٹی قیادت کے قانونی مقدمات میں معاونت کا وعدہ کیا تھا۔

دوسری جانب اپوزیشن اتحاد کی جانب سے اخوانزادہ حسین یوسفزئی کا نام بطور امیدوار تجویز کیا گیا، جس کی تصدیق علامہ ناصر عباس نے بھی کی، ان کے مطابق یہ نام محمود خان اچکزئی اور اپوزیشن رہنماؤں کی مشاورت سے پیش کیا گیا ہے۔