اسلام آباد(نیوزڈیسک)پاکستان مسجد اقصیٰ (الحرم الشریف) میں اسرائیلی قابض افواج کے داخل ہونے کی شدید ترین الفاظ میں مذمت کرتا ہے۔ یہ قابلِ مذمت اقدام مقدس مقام کی حرمت اور اس کی تاریخی حیثیت پر براہِ راست حملہ ہے اور بین الاقوامی قوانین اور متعلقہ اقوامِ متحدہ کی قراردادوں کی خلاف ورزی ہے۔پاکستان اسرائیلی قابض حکام کی جانب سے مسجد اقصیٰ کی قائم شدہ مذہبی، تاریخی اور قانونی حیثیت کو تبدیل یا کمزور کرنے کی تمام کوششوں کو یکسر مسترد کرتا ہے، اور عالمی برادری سے مطالبہ کرتا ہے کہ وہ ایسے اشتعال انگیز اقدامات کو روکنے کے لیے فوری اور مؤثر اقدامات کرے۔پاکستان فلسطینی عوام کے جائز مؤقف کے لیے اپنی غیر متزلزل اور اصولی حمایت کا اعادہ کرتا ہے، جس میں ان کا حقِ خود ارادیت شامل ہے، اور جون 1967 سے پہلے کی سرحدوں کی بنیاد پر ایک آزاد، خودمختار، قابلِ عمل اور متصل ریاستِ فلسطین کے قیام کی حمایت کرتا ہے، جس کا دارالحکومت القدس الشریف ہو۔