اسلام آباد: حکومت نے امریکا اور ایران کے درمیان حالیہ کامیاب جنگ بندی کے موقع پر آئندہ جمعہ کو یوم تشکر منانے کا فیصلہ کیا ہے۔
وزیراعظم شہباز شریف کی صدارت میں کابینہ کا اجلاس ہوا، جس میں پاکستان کی ثالثی کے ذریعے دونوں ممالک کے درمیان مذاکرات اور جنگ بندی میں کلیدی کردار پر غور کیا گیا۔ کابینہ ارکان نے وزیراعظم کا استقبال کھڑے ہو کر تالیاں بجا کر کیا اور ان کی قیادت کو سراہا۔
اجلاس میں وزیراعظم نے بتایا کہ فیلڈ مارشل عاصم منیر اور نائب وزیراعظم و وزیر خارجہ اسحاق ڈار نے امریکا اور ایران کے درمیان ثالثی میں انتھک محنت کی۔ وزیراعظم نے کہا کہ فیلڈ مارشل عاصم منیر کئی راتیں جاگتے رہے، امریکی اور ایرانی قیادت سے مسلسل رابطے میں رہے، اور ان کی کوششیں واقعی بے مثال ہیں۔ نائب وزیراعظم اسحاق ڈار نے بھی جنگ بندی کو مستقل امن میں تبدیل کرنے کے لیے محنت کی۔
وزیراعظم نے کہا کہ پاکستان کی قیادت کی یکسوئی، خلوص اور نیک نیتی نے خطے میں امن قائم کرنے میں کلیدی کردار ادا کیا۔ پاکستان کو مذاکرات کی میزبانی کا شرف حاصل ہوا اور صدر مملکت آصف زرداری اور بلاول بھٹو زرداری کی کاوشیں بھی قابل تحسین ہیں۔
شہباز شریف نے مزید کہا کہ یہ جنگ بندی صرف دو ہفتوں کے لیے ہے، مگر اللہ کی مدد سے اگر مستقل امن قائم ہو جائے تو یہ تاریخی کامیابی ہوگی۔ انہوں نے ایرانی اور امریکی قیادت کا شکریہ ادا کیا اور سعودی عرب، چین اور دیگر خلیجی ممالک کی حمایت کو بھی سراہا۔ وزیراعظم نے اس بات پر زور دیا کہ پاکستان اور سعودی عرب دو بھائی اور ایک خاندان کی طرح ہمیشہ ساتھ کھڑے ہیں۔
وزیراعظم نے اس موقع کو آئندہ نسلوں کے لیے سبق قرار دیتے ہوئے کہا: “جب رب پر توکل ہو تو وہ مدد کرتا ہے۔ یہ کہانی کتاب کی شکل میں آئندہ نسلوں کے لیے رہنمائی کرے گی۔”
اجلاس میں وزیراعظم نے امریکی اور ایرانی وفود کے پاکستان آنے کی اطلاع بھی دی اور تمام وزرا، سابق وزرا اور معاونین کی کاوشوں کا شکریہ ادا کیا، بتایا کہ آج ایک بدلا ہوا پاکستان دنیا میں عزت کی نگاہ سے دیکھا جا رہا ہے۔