بارش سے متاثرہ پہلے ون ڈے میچ میں بنگلہ دیش نے شاندار کارکردگی کا مظاہرہ کرتے ہوئے آسٹریلیا کو ڈک ورتھ لوئس (DLS) میتھڈ کے تحت 86 رنز سے شکست دے دی۔ اس کامیابی میں فاسٹ بولر ناہید رانا کی تباہ کن بولنگ نے اہم کردار ادا کیا، جنہوں نے آسٹریلوی بیٹنگ لائن کو شدید نقصان پہنچایا۔

میچ میں بنگلہ دیش نے پہلے بیٹنگ کرتے ہوئے مقررہ 50 اوورز میں 8 وکٹ کے نقصان پر 284 رنز بنائے۔ میزبان ٹیم کی جانب سے مصدق حسین نے شاندار 86 رنز کی ناقابل شکست اننگز کھیلی، جبکہ کپتان نجم الحسن شانتو نے 67 اور تنزید حسن نے 54 رنز بنائے۔ آسٹریلیا کی جانب سے نیتھن ایلس نے 3 وکٹیں حاصل کیں۔

اننگز کے وقفے کے دوران بارش نے کھیل میں خلل ڈالا، تاہم بعد میں میچ دوبارہ شروع ہوا۔ آسٹریلیا کی ٹیم جب 42.2 اوورز میں 9 وکٹوں کے نقصان پر 191 رنز تک پہنچی تو ایک بار پھر بارش کے باعث کھیل روک دیا گیا اور دوبارہ شروع نہ ہو سکا۔

ڈک ورتھ لوئس میتھڈ کے تحت آسٹریلیا کو مقررہ ہدف سے 86 رنز پیچھے قرار دیا گیا، جس کے باعث بنگلہ دیش کو فاتح قرار دیا گیا۔ اس وقت آسٹریلیا کی جانب سے کیمرون گرین 52 رنز کے ساتھ ناٹ آؤٹ تھے۔

مزیدپڑھیں:یورپی ممالک جانے کے خواہشمند افراد کے لیے اہم خبر

بنگلہ دیش کی جانب سے ناہید رانا نے شاندار بولنگ کا مظاہرہ کرتے ہوئے 4 وکٹیں حاصل کیں اور ٹیم کی فتح میں کلیدی کردار ادا کیا۔

یہ فتح تاریخی اہمیت کی حامل ہے کیونکہ بنگلہ دیش نے 21 سال بعد آسٹریلیا کے خلاف ون ڈے میچ میں کامیابی حاصل کی ہے۔ اس سے قبل بنگلہ دیش نے آخری بار 18 جون 2005 کو کارڈف میں آسٹریلیا کو شکست دی تھی۔