ریاض (خصوصی رپورٹ): اقوامِ متحدہ کے تعلیمی، سائنسی و ثقافتی ادارے ‘یونیسکو’ (UNESCO) نے عالمی سطح پر مصنوعی ذہانت (AI) کے ذمہ دارانہ اور اخلاقی استعمال کو فروغ دینے کے لیے اپنی بین الاقوامی کوششوں کو تیز کر دیا ہے۔

اس سلسلے میں سعودی عرب کا دارالحکومت ریاض 14 سے 17 ستمبر 2026 تک یونیسکو کے چوتھے “گلوبل فورم آن ایتھکس آف آرٹیفیشل انٹیلی جنس” کی میزبانی کرے گا۔

یہ اہم عالمی فورم یونیسکو، سعودی ڈیٹا اینڈ آرٹیفیشل انٹیلی جنس اتھارٹی (SDAIA) اور انٹرنیشنل سینٹر فار اے آئی ریسرچ اینڈ ایتھکس (ICAIRE) کے مشترکہ تعاون سے منعقد کیا جا رہا ہے۔ سعودی عرب اس بین الاقوامی فورم کی میزبانی کرنے والا پہلا عرب ملک ہوگا، جس میں دنیا کے تقریباً 95 ممالک کے نمائندے، پالیسی ساز، ٹیکنالوجی ماہرین اور محققین شرکت کریں گے۔

اس چار روزہ کانفرنس میں جدید ترین ٹیکنالوجی کے معاشی، سماجی اور انسانی حقوق پر مرتب ہونے والے اثرات کا تفصیل سے جائزہ لیا جائے گا۔ گفتگو کا بنیادی محور مصنوعی ذہانت کی اخلاقیات، شفافیت، عدم مساوات کا خاتمہ، قومی اور بین الاقوامی پالیسی فریم ورک کی تیاری، اور ٹیکنالوجی کے پائیدار ترقی کے لیے استعمال کو یقینی بنانا ہوگا۔

یہ پہل کاری یونیسکو کی 2021 کی اس سفارش پر مبنی ہے جس پر 194 رکن ممالک نے دستخط کیے تھے، تاکہ اے آئی کی پیشرفت کو انسانی وقار اور بنیادی حقوق کے تابع رکھا جا سکے۔

مزید پڑھیں:بلوچستان کی صورتحال پر دفاعی جائزہ اجلاس، سیف سٹی پروجیکٹ فعال کرنیکا فیصلہ

ماہرین کے مطابق ریاض فورم ایک ایسے وقت میں منعقد ہو رہا ہے جب ایجوکیشن، ہیلتھ کیئر، لیبر مارکیٹ اور ڈیٹا پرائیویسی کے شعبوں میں اے آئی کے تیز رفتار نفاذ سے پیدا ہونے والے اخلاقی چیلنجز پر فوری عالمی حکمتِ عملی کی ضرورت محسوس کی جا رہی ہے۔