کرک: خیبر پختونخوا کے علاقے کرک میں پولیس اور کاؤنٹر ٹیررازم ڈیپارٹمنٹ (سی ٹی ڈی) نے انٹیلیجنس بیسڈ کارروائی کے دوران 2 دہشت گردوں کو ہلاک کردیا جب کہ دیگر دہشت گرد فرار ہوگئے۔

ڈی پی او کرک عمران خان کے مطابق علاقے میں کالعدم تنظیم کے اہلکاروں کی موجودگی کی اطلاع پر پولیس اور سی ٹی ڈی کو متحرک کیا گیا، سی ٹی ڈی کوہاٹ ریجن نے ضلع کرک میں نیکی صاحب زیارت کے قریب تھانہ خرم کی حدود میں کارروائی کی۔

اُنہوں نے کہا کہ کارروائی کے دوران مسلح افراد نے اہلکاروں پر فائرنگ کی، جس پر جوابی کارروائی کی گئی، فائرنگ کے تبادلے میں 2 خوارج ہلاک ہوئے جب کہ دیگر دہشت گرد فرار ہوگئے۔

حکام نے بتایا کہ ہلاک دہشت گردوں کے قبضے سے 2 ہینڈ گرینیڈز، 2 ایس ایم جیز، 6 میگزین اور متعدد کارتوس برآمد ہوئے۔

پولیس کا کہنا ہے کہ دہشت گرد علاقے میں سڑک پر ناکہ بندی اور سڑک کنارے بارودی مواد نصب کرنے کی منصوبہ بندی میں مصروف تھے۔

مزید پڑھیں:ملکی آئل ریفائنریز میں اربوں ڈالر کی سرمایہ کاری کی راہ ہموارہوگئی

دوسری جانب واقعے کے بعد پولیس کی بھاری نفری نے علاقے کو گھیرے میں لے کر کلیئر کردیا جب کہ فرار دہشت گردوں کی گرفتاری کے لیے سرچ آپریشن جاری ہے۔