قطر کے وزیراعظم شیخ محمد بن عبدالرحمان آل ثانی نے خلیجی ممالک اور ایران کو مشترکہ علاقائی سکیورٹی فریم ورک میں شامل کرنے پر زور دیا ہے۔

غیر ملکی میڈیا کے مطابق نیویارک میں جنرل اسمبلی کے موقع پر قطر اکنامک فورم تقریب سے خطاب کرتے ہوئے قطری وزیراعظم کا کہنا تھا کہ ایران ہمارا ہمسایہ، امریکا اسٹریٹجک اتحادی اور خلیج ہمارا قدرتی سکیورٹی اتحاد ہے۔

آل ثانی نے مزید کہا کہ ہمیں سمجھنا ہو گا کہ جب تک ایسا سکیورٹی فریم ورک قائم نہیں ہوتا جو خلیجی ممالک اور ایران کو ایک ساتھ لائے اور اس بات کو یقینی بنائے کہ ہم میں سے کوئی ایک دوسرے کے لیے خطرہ نہ بنے، اس خطے میں صورتحال معمول پر نہیں آ سکتی۔

ان کا کہنا تھا کہ ہمیں ذمہ داری کے ساتھ مل کر کام کرنا ہو گا اور اس بات کو یقینی بنانا ہو گا کہ ہمارے ایران کے ساتھ اچھے تعلقات ہوں اور ایران کے بھی خلیجی ممالک کے ساتھ اچھے تعلقات ہوں۔

انہوں نے مزید کہا کہ موجودہ صورتحال قطر اور خطے سمیت عالمی سلامتی کو بھی متاثر کر رہی ہے۔ روزانہ کے واقعات مذاکرات کی سمت تبدیل کر رہے ہیں، تنازع کے خاتمے کیلئے واضح جامع حکمت عملی موجود نہیں، بنیادی طور پر یہی وہ چیز ہے جس کی آج ہمیں کمی محسوس ہو رہی ہے۔

شیخ محمد بن عبدالرحمان آل ثانی نے کہا کہ ہم فریقین کے درمیان پیغامات پہنچانے کی کوشش کر رہے ہیں، تاہم ہمیں یہ بھی تسلیم کرنا ہو گا کہ یہ تنازع انتہائی پیچیدہ ہے۔

قطری وزیراعظم نے کہا کہ قطر ثالثی کی کوششیں جاری اور رابطے کے ذرائع برقرار رکھے گا اور کشیدگی کم کرنے اور سفارتی مفاہمت کو فروغ دینے کے لیے علاقائی و عالمی شراکت داروں کے ساتھ کام کرے گا۔

مزید پڑھیں:لانگ مارچ ہر صورت ہو گا، مزید تفصیلات 25 ستمبر کو، سہیل آفریدی

قطری وزیراعظم کا یہ بیان ایسے وقت میں سامنے آیا ہے جب عالمی رہنما اقوام متحدہ کی جنرل اسمبلی کے اجلاس کے لیے نیویارک میں موجود ہیں۔ امریکا، اسرائیل اور ایران کے درمیان جاری جنگ اور اس کے خطے پر پڑنے والے اثرات خلیجی ممالک کو درپیش اہم ترین معاملات میں شامل ہیں۔