پرتگال کے اسٹار فٹبالر کرسٹیانو رونالڈو(Cristiano Ronaldo) نے ارجنٹائن کے لیجنڈ لیونل میسی کے بین الاقوامی کیریئر کے اختتام پر انہیں خراجِ تحسین پیش کرتے ہوئے محبت اور احترام کا اظہار کیا ہے۔
لیونل میسی کے ارجنٹائن کی جانب سے آخری بین الاقوامی میچ کے بعد دنیا بھر سے انہیں خراجِ تحسین پیش کیا گیا، ایسے میں روایتی حریف اور فٹبال کے اسٹار کرسٹیانو رونالڈو بھی اپنے جذبات کے اظہار سے پیچھے نہ رہے۔
View this post on Instagram
رونالڈو نے میسی کی تازہ ترین انسٹاگرام پوسٹ پر تبصرہ کرتے ہوئے لکھا،’ لیو، کئی برس تک اپنے ملک کی نمائندگی کرتے ہوئے ایسی شاندار تاریخ رقم کرنے پر تمہیں خراجِ تحسین۔ ارجنٹائن کے ساتھ تم نے جو کامیابیاں حاصل کیں ان پر دل سے احترام ہے‘۔
رونالڈو کا مختصر مگر جذباتی پیغام اس وقت سامنے آیا جب 39 سالہ لیونل میسی نے بینن کے خلاف ارجنٹائن کی جانب سے اپنا آخری بین الاقوامی میچ کھیلا۔
لیونل میسی نے اپنے 21 سالہ بین الاقوامی کیریئر کا اختتام بھی شاندار انداز میں کیا۔ انہوں نے بینن کے خلاف میچ میں ایک گول اسکور کرنے کے ساتھ 2 گولز میں معاونت کی جس کی بدولت ارجنٹائن نے بیونس آئرس کے مونومینٹل اسٹیڈیم میں 3-0 سے کامیابی حاصل کی۔
میچ کے دوران 85 ہزار سے زائد شائقین اپنے ہیرو کو الوداع کہنے کیلئے اسٹیڈیم میں موجود تھے۔ میسی کے اعزاز میں موسیقی، خصوصی خراجِ تحسین اور ڈرون شو کا بھی اہتمام کیا گیا۔
میسی اور رونالڈو نے گزشتہ دو دہائیوں سے زائد عرصے تک عالمی فٹبال پر اپنی حکمرانی قائم رکھی۔ دونوں کھلاڑیوں کا مسلسل موازنہ کیا جاتا رہا اور ان کی حریفانہ رقابت فٹبال کی تاریخ کی سب سے مشہور بحثوں میں شمار ہوتی ہے۔
تاہم رونالڈو کا حالیہ پیغام اس بات کا واضح اظہار ہے کہ میدان میں شدید مسابقت کے باوجود دونوں عظیم کھلاڑی ایک دوسرے کی صلاحیتوں اور کامیابیوں کا احترام کرتے ہیں۔
41 سالہ کرسٹیانو رونالڈو خود بھی اپنے بین الاقوامی کیریئر کے آخری مرحلے میں ہیں۔ حالیہ دنوں پرتگال کے کوچ جارج جیزس کے ساتھ مبینہ اختلافات کے باعث وہ خبروں میں رہے ہیں۔
فٹبال شائقین کو اب انتظار ہے کہ جب رونالڈو بھی پرتگال کی نمائندگی سے رخصت ہوں گے تو انہیں میسی کی طرح شاندار اور باوقار الوداع ملے گا یا نہیں۔
میسی اور رونالڈو نے ایک ہی دور میں غیر معمولی کامیابیاں حاصل کیں اور تقریباً دو دہائیوں تک فٹبال کی دنیا پر چھائے رہے۔ ان دونوں کی موجودگی نے کھیل کو نئی بلندیوں تک پہنچایا اور دنیا بھر میں کروڑوں مداحوں کو اپنی جانب متوجہ کیا۔
