امریکی ریاست وسکونسن کی ساؤک کاؤنٹی میں ایک چھوٹا مسافر طیارہ گر کر تباہ ہو گیا ہے، جس کے نتیجے میں طیارے میں سوار بچے سمیت تمام چھ افراد ہلاک ہو گئے ہیں۔

تفصیلات کے مطابق حادثہ منگل کی شب 13 اکتوبر کو ساؤک کاؤنٹی کے علاقے ڈی لونا میں پیش آیا۔ امریکی نشریاتی ادارے اے بی سی نیوز اور مقامی حکام کے مطابق ڈسپیچ سینٹر کو رات تقریباً 9 بج کر 31 منٹ پر طیارہ گرنے کی اطلاعات موصول ہوئیں، جس پر پولیس اور امدادی ٹیمیں فوری طور پر جائے وقوعہ کی طرف روانہ ہوئیں۔

حادثے کا شکار ہونے والا طیارہ ’پائپر پی اے 46‘ (Piper PA-46) تھا، جو کینوشا سے مینومونی کی جانب سفر پر تھا؛ طیارے میں پانچ بالغ افراد اور ایک بچہ سوار تھا، جن کی امدادی اہلکاروں کو جائے حادثہ سے لاشیں موصول ہوئیں۔ طیارے کا ملبہ ڈی لونا کے علاقے میں پارک لین اور ہیروِگ روڈ کے قریب واقع گھنے جنگل سے ملا۔ حکام کے مطابق زمین پر کسی قسم کا جانی یا مالی نقصان نہیں ہوا۔

ساؤک کاؤنٹی انتظامیہ کے مطابق، پرواز کے دوران طیارہ ایئر ٹریفک کنٹرول کے ساتھ رابطے میں تھا اور تفتیش کار آخری پیغامات کا باریک بینی سے جائزہ لے رہے ہیں۔ امریکی فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) نے حادثے کی وجوہات اور موسمی صورتحال کا تعین کرنے کے لیے باقاعدہ تحقیقات شروع کر دی ہیں، تاہم ہلاک شدگان کی شناخت فی الحال ظاہر نہیں کی گئی۔