سیالکوٹ میں پولیس نے مہندی کے واقعے میں جاں بحق نوجوان کے بہنوئی کو دھمکیاں دینے پر ٹک ٹاکر مسٹر پتلو کو گرفتار کر لیا ہے۔
خبر رساں ادارے کے مطابق سیالکوٹ کے علاقے صدر میں ڈسکہ پولیس نے معروف ٹک ٹاکر انصر جٹ المعروف مسٹر پتلو کو حراست میں لینے کی باضابطہ تصدیق کر دی ہے۔ پولیس حکام کا کہنا ہے کہ ملزم کی گرفتاری مہندی کی تقریب کے دوران مچنے والی بھگدڑ میں جاں بحق ہونے والے نوجوان ریحان کے بہنوئی کی جانب سے درج کروائی گئی مدعیت میں عمل میں لائی گئی ہے۔ واقعے کے بعد پولیس نے فوری پیش رفت کرتے ہوئے نامزد ملزم کو دھر لیا ہے تاکہ قانونی کارروائی کو آگے بڑھایا جا سکے۔
خبر رساں ادارے کے مطابق مقدمے کے مدعی نے پولیس کو دیے گئے بیان میں مؤقف اختیار کیا ہے کہ قتل کے مقدمے میں نامزد ملزمان اور ان کے حمایتیوں کی جانب سے اسے اور اس کے پورے اہلخانہ کو پیچھا کرنے اور سنگین نتائج بھگتنے کی مسلسل دھمکیاں دی جا رہی تھیں۔ مدعی کے مطابق ان دھمکیوں کا مقصد کیس سے دستبردار ہونے کے لیے دباؤ ڈالنا تھا۔ پولیس کی جانب سے درج کی جانے والی ایف آئی آر میں ٹک ٹاکر مسٹر پتلو کے ساتھ ساتھ ان کے بھائی کاشف بشیر کو بھی نامزد کیا گیا ہے، جبکہ پولیس کا کہنا ہے کہ دیگر نامزد ملزمان کی گرفتاری کے لیے بھی چھاپے مارے جا رہے ہیں اور کیس کی میرٹ پر تفتیش جاری ہے۔
