کرائسٹ چرچ (سپورٹس ڈیسک )سہ ملکی ٹی ٹوئنٹی سیریز کے آخری گروپ میچ میں بنگلادیش نے پاکستان کو جیت کے لیے 174 رنز کا ہدف دیا ہے، بنگلا دیش نے ٹاس جیت کر پہلے بیٹنگ کا فیصلہ کیا اور 20 اوورز میں 6وکٹوں کے نقصان پر 173 رنز بنائے ۔

تفصیلات کے مطابق بنگلادیش کی جانب سے لٹن داس اور کپتان شکیب الحسن نے بہترین کھیل پیش کیا اور بالترتیب 69 اور 68 رنز بنائے، اوپنرز نجم الحسین شنتو 12 اور سومیا سرکار 4 رنز بناکر پویلین لوٹے،اس کے علاوہ عفیف حسین 11 رنز بناکر رن آؤٹ ہوئے اور یاسر علی ایک ہی رن بناسکے۔ نور الحسن 2 اور محمد سیف الدین ایک رن بناکر ناٹ آؤٹ رہے۔

پاکستان کی جانب سے نسیم شاہ نے بہترین بولنگ کا مظاہرہ کیا اور 4 اوورز میں 6.75 کی ایوریج سے 27 رنز دے کر 2 وکٹیں حاصل کیں، محمد وسیم جونیئر نے 4 اوورز میں 8.25 کی اوسط سے 33 رنز دے کر 2 کھلاڑیوں کو آؤٹ کیا، پاکستان کی جانب سے سپنرز کافی مہنگے بولرز ثابت ہوئے ۔

واضح رہے کہ بنگلا دیش کی ٹیم لگاتار 3میچ ہارنے کے بعد ٹورنامنٹ سے باہر ہوچکی ہے، ایونٹ کا فائنل کل بروز جمعہ نیوزی لینڈ اور پاکستان کی ٹیموں کے درمیان ہوگا۔