آسٹریلیا کے شہر پرتھ میں کھیلے جانے والے میچ میں جنوبی افریقہ نے بھارت کو پانچ وکٹوں سے ہرا دیا ہے۔
بھارت نے جنوبی افریقہ کو 134 رنز کا ہدف دیا تھا جو اس نے آخری اوور میں حاصل کر لیا۔
جنوبی افریقہ کی اننگز میں اس کی پہلی وکٹ ارشدیپ سنگھ نے کوئنٹن ڈی کاک کو آؤٹ کر کے حاصل کی، جبکہ دوسری وکٹ بھی ارشددیپ سنگھ نے ریلی روسو کو پویلین کی راہ دکھا کر لی۔
کپتان تمبا باؤما، محمد شامی کی گیند پر آؤٹ ہوئے۔ مارکرم 52 بنا کر ہاردیک پانڈیا کی گیند پر پویلین لوٹے۔ روی چندرن نے سٹبز کی وکٹ حاصل کی۔
بھارت نے ٹاس جیت کر بیٹنگ کا فیصلہ کیا تھا۔ بھارت کی اننگز میں سوریا کمار یادیو کے علاوہ کوئی کھلاڑی بھی وکٹ پر نہ ٹھہر سکا۔ سوریا کمار یادیو نے68 رنز کی اننگز کھیلی، ان کے علاوہ کپتان روہت شرما 15 اور ویرات کوہلی نے 12 رنز بنائے۔
بھارت کی پہلی دو وکٹیں پاور پلے میں گر گئیں۔ کے ایل راہل اور روہت شرما کو لونگی نگیڈی نے آؤٹ کیا۔ وراٹ کوہلی کو بھی لونگی نگیڈی نے پویلین کی راہ دکھائی۔
اینرک نورتجے نے دیپک ہودا کو آؤٹ کر کے انڈیا کو مشکل سے دوچار کیا۔ اس کے بعد لونگی نگیڈی نے ہادیک پانڈیا کی وکٹ لی اور اس طرح انہوں نے میچ کی چوتھی وکٹ اپنے نام کی۔
پارنیل نے دنیش کارتیک کا شکار کیا اور اس کے بعد پارنیل نے ایشون کو بھی آؤٹ کیا۔ پارنیل نے اپنی تیسری وکٹ سوریا کمار یادو کو آؤٹ کر کے حاصل کی۔
اینرک نورتجے نے میچ کے آخری اوور میں محمد شامی کو آؤٹ کیا۔
گروپ ٹو میں پوائنٹس ٹیبل پر انڈیا کے چار پوائنٹس کے ساتھ پہلے نمبر پر ہے اور اس کا نیٹ رن ریٹ 1.425 ہے، جبکہ جنوبی افریقہ تین پوائنٹس کے ساتھ تیسرے نمبر پر ہے۔

بھارت نے اب تک دو میچز کھیلے ہیں اور دونوں ہی جیتے ہیں۔ جنوبی افریقہ نے دو میچز کھیلے جبکہ ایک جیتا ہے۔
پاکستان کے لیے انڈیا کی جنوبی افریقہ کے خلاف جیت ضروری ہے، کیونکہ پاکستان کی سیمی فائنل تک رسائی میں بھارت کی ہر میچ میں فتح پاکستان کے لیے اہم ہے۔
پاکستان کی سیمی فائنل تک رسائی کے لیے ضروری ہے کہ بھارت جنوبی افریقہ، زمبابوے اور بنگلہ دیش کو شکست دے۔
زمبابوے سے ہار کے بعد پاکستان کا دوسری ٹیموں کے میچز اور نیٹ رن ریٹ پر انحصار ہے۔ گروپ ٹو میں پاکستان کے پوائنٹس دو ہیں اور نیٹ رن ریٹ 0.765 ہے۔
پاکستان کے لیے اپنے تمام میچز جیتنا ضروری ہے ورنہ وہ ٹورنامنٹ سے باہر ہو جائے گا۔