بھارتی کرکٹر رشبھ پنت کی گاڑی کو گزشتہ روز خوفناک حادثہ پیش آیا جس کی ویڈیوز اور تصاویر بھی منظر عام پر آگئی ہیں۔
ویڈیوز اور تصاویر میں دیکھا جاسکتا ہے کہ گاڑی بہت ہی تیز رفتاری سے ہائی وے کی ریلنگ سے ٹکرائی جس کے بعد اس میں آگ بھی بھڑک اٹھی تھی۔
ویڈیوز میں حادثے کی سنگینی کو دیکھنے کے بعد موقع پر موجود بس ڈرائیور کے کردار کو اب سوشل میڈیا پر بہت زیادہ سراہا جارہا ہے۔
بھارتی میڈیا کے مطابق حادثے کے فوری بعد موقع پر سب سے پہلے پہنچے والے شخص کا نام سشیل ہے جو کہ بس ڈرائیور ہے۔
بھارتی میڈیا کے مطابق سشیل نے سب سے پہلے رشبھ کی مدد کی اور ایمبولینس کو بھی اسی نے بلایا۔
بس ڈرائیور کی تعریف
سابق بھارتی کرکٹراور نیشنل کرکٹ اکیڈمی کے سربراہ وی وی ایس لکشمن نے رشبھ پنت کی مدد کرنے والے بس ڈرائیور کا شکریہ ادا کیا ہے۔
سوشل میڈیا اکاؤنٹ پر وی وی ایس لکشمن نے لکھا کہ سشیل نے رشبھ پنت کو جلتی ہوئی گاڑی سے باہر نکال کر انہیں بیڈ شیٹ پہنائی اور ایمبولینس کو بلایا۔
سابق بھارتی کرکٹر نے بس ڈرائیور کی تعریف کرتے ہوئے اس کا شکریہ بھی ادا کیا۔
وی وی ایس لکشمن نے اپنے پیغام میں بس کے کنڈکٹر کی بھی تعریف کی۔
Gratitude to #SushilKumar ,a Haryana Roadways driver who took #RishabhPant away from the burning car, wrapped him with a bedsheet and called the ambulance.
We are very indebted to you for your selfless service, Sushil ji 🙏 #RealHero pic.twitter.com/1TBjjuwh8d— VVS Laxman (@VVSLaxman281) December 30, 2022
یاد رہے کہ گزشتہ روز علی الصبح رشبھ پنت کی گاڑی کو ریاست اترکھنڈ سے نئی دلی آتے ہوئےحادثہ پیش آیا تھاجس کے بعدگاڑی میں آگ بھڑک اٹھی تھی۔
