لندن : ایک برطانوی خاتون نے سوشل میڈیا پر ایک حیران کن دعویٰ کیا ہے کہ انہوں نے 9 سال قبل مرنے والے شوہرکو فیس بک کی ایک ویڈیو میں دیکھا ہے۔
یہ بات اس خاتون نے بھارتی ریسٹورنٹ کی ایک پروموشنل ویڈیو کے کمنٹس سیکشن میں کہی، خاتون کا کہنا تھا کہ میرے شوہر کا انتقال سال2014 میں ہوگیا تھا۔
برطانوی اخبار’ڈیلی میل‘ کی رپورٹ کے مطابق اس وڈیو کلپ میں لوگوں کو ریستوران میں ڈنر کرتے ہوئے دیکھا جاسکتا ہے جبکہ ریسٹورنٹ کا عملہ بھی درمیان میں موجود ہے، ویڈیو کا اختتام ملازمین کی تالیوں کی گونج سے ہوا۔
اس ویڈیو کو ریستوران کے فیس بک پیج پر پوسٹ کیا گیا تھا، اس کلپ پر لوسی واٹسن نامی خاتون نے تبصرہ کیا کہ فوٹیج کتنی پرانی ہے؟
انہوں نے لکھا کہ اس کے شروع میں میرے مرحوم شوہر اور بیٹا موجود ہیں۔ میرے شوہر 2014 میں فوت ہو گئے تھے۔ ریسٹورنٹ انتظامیہ نے جواب میں کہا کہ ہیلو لوسی یہ بات جان کر افسوس ہوا۔ ہم نے یہ فوٹیج پچھلے ہفتے ریکارڈ کی گئی تھی۔
انگلینڈ کے علاقے ویسٹ سسکس کے گاؤں ویسٹ بورن میں مذکورہ ریستوران کی ویب سائٹ پر موجود ایک فوٹیج پر بڑے پیمانے پر سوشل میڈیا تبصرے سامنے آئے ہیں۔ یہ ویڈیو کلپ اس ماہ کے شروع میں ریکارڈ کیا گیا تھا۔
مذکورہ ریستوران انتظامیہ نے 16 جنوری کو مندرجہ ذیل عنوان کے ساتھ ایک ویڈیو پوسٹ کی تھی جس کا عنوان تھا نیا سال، نیا موڈ۔
سوشل میڈیا صارفین کی جانب سے اس عجیب وغریب ویڈیو سے متعلق اپنے سوالات اور خیالات کا اظہار کیا گیا، تاہم مسز واٹسن یا ریستوران کی جانب سے ان سوالات کی کوئی وضاحت سامنے نہیں آئی کہ معاملے اصل کی حقیقت کیا ہے۔